ВЛАДАТА на Република Северна Македонија денес одлучи да воведе нова, дополнителна рамка на забраната за движење за време на викенди т.е сабота и недела од 16 часот до 05 часот.
НОВОРОДЕНЧИЊАТА и предшколските деца може да се вакцинираат во редовен термин, а за школските деца вакцината може да се одложи два до три месеца. Тоа е стручно мислење на Комитетот за имунизација, рече министерот за здравство Венко Филипче.
ДВАЈЦА пациенти со корона вирус на Клиниката за инфективни болести се ставени на комбинирана терапија со лековите хидроклор и азитромицин, познат како сумамед, што веќе се покажа ефикасен во повеќе земји. Оваа терапија не се дава на сите пациенти, потребно е претходно да се направи кардиолошка анализа (ЕКГ). Значи ако има и најмала промена во ЕКГ-то тогаш оваа терапија е контраиндицирана.
БЕЗБЕДНОСНАТА состојба на подрачјето на општините Дебар и Центар Жупа, каде е прогласена кризна состојба е стабилна. Непречено се реализираат мото-патролите што ги спроведуваат полициските службеници. Притоа, не се регистрирани собирања на граѓани на јавни места, нема нарушувања на јавниот ред и мир и нема регистрирани сообраќајни незгоди.
ЖИТЕЛ на Скопје е обвинет за непостапување според здравствените прописи за време на епидемија. Триесет и тригодишниот скопјанец на 12 март се врати од Франција и потпишал изјава за самоизолација.
ПРЕТСЕДАТЕЛОТ на Стопанската комора, Бранко Азески вчера со писмен допис се обратил до неговиот колега, претседателот на Унијата на комори и стокови берзи на Турција, Рифат Хисарчиклиоглу и го замолил во рамките на неговите овластувања да се заложи за надминување на постојниот проблем.
НА територијата на државата, по однос на непочитување на забраната за движење во периодот од 21 до 05 часот, полицијата евидентирала 103 лица кои не ја почитувале оваа мерка, при што 63 лица биле приведени во полициска станица, 31 лице се опоменати.
САМОСТОЈНИОТ синдикат на новинари и медиумски работници (ССНМ), Здружението на новинари (ЗНМ) и Советот за етика во медиумите во Македонија (СЕММ) упатуваат заеднички апел до локалната самоуправа, државни институции, стопански субјекти и поединци да помогнат во рамките на своите можности за што побрзо враќање на телевизијата ВИС од Струмица во етер.
АЛБАНСКАТА Влада прогласи состојба на природна непогода на целата територија на земјата во период од 30 дена. Донесувањето на оваа одлука значи дека Владата и општините имаат законска обврска да ги компензираат сите граѓани погодени од природната непогода.
ВО Србија во изминативе 24 часа, од 245 новотестирани, позитивни на корона вирусот било 81 лице, со што вкупниот број на заразени се зголеми на 384 лица.
ПОДОФИЦЕР и војник во Армијата на Република Северна Македонија се позитивни на корона вирусот, соопшти денеска Генералштабот на Армијата. Двајцата извршувале работни задачи во гарнизонот Скопје, од кои едниот припадник извршувал работни задачи во воениот ресторан во касарната Илинден како помошен персонал.
НА посиромашните земји им се потребни две милијарди долари меѓународна хуманитарна помош за да се спраат со пандемијата на корона вирусот, изјави координаторот за итната помош при Обединетите нации, Марк Лоукок.
