Заповедникот на американскиот носач на авиони „Теодор Рузвелт“, на кој има повеќе од 4.000 членови на екипажот, побарал итна помош заради епидемијата на корона вирус на неговиот брод.
„Не сме во војна, морнарите не мораaт да умрат. Доколку не делуваме сега, нема да можеме да се погрижиме за нашите највредни, за нашите морнари“, напиша капетанот Брет Крозиер во писмото упатено до Пацифичката флота на американската морнарица, потврдено е за Си-Ен-Ен.
„Ширењето на болеста е во тек и се забрзува“, додава капетанот на бродот, препорачувајќи сите од екипажот да заминат во карантин.
„Потребни се одлучни акции. Извлекувањето на поголемиот дел од персоналот од нуклаерниот носач на авиони и нивното изолирање на две недели може да изгледа како вонредна мерка. Но тоа е потребно за безбедноста на нашите морнари“, напиша Крозиер и додаде дека е непотребен ризик да се задржуваат над 4.000 млади луѓе на бродот.
Писмото на капетанот прв го објави весникот „Сан Франциско хроникл“, наведувајќи дека најмалку стотина војници се заразени со вирусот.
Американската морнарица соопшти дека прави сѐ што треба за да се преземат неопходните мерки кои ќе го осигураат здравјето на морнарите на бродот, што во моментов е закотвен во Гуам.
Засега не се знае како вирусот влегол на носачот, но најверојатно го внел некој од морнарите во текот на престојот во Виетнам, каде „Теодор Рузвелт“ беше закотвен пред две недели.
Морарицата забрзано работи на изнесувањето на заразените морнари од бродот, а Пентагон тврди дека целиот екипаж ќе биде тестиран на корона вирус.
