ИСА2 е централна програма на Европската Унија која поддржува активности за развој на ИКТ во администрацијата, електронски услуги, и дигитализација во јавниот сектор, генерално.
“Едноставно кажано ова е местото каде што се прават планови за развој на информатичкото општество и размена на искуства помеѓу државите членки како и развој на нови стандарди и технологии од областа, а ние ќе можеме да дадеме свој придонес. Оваа програма е наменета за земјите членки на Европската Унија, но направен е исклучок да се дозволи и нашата држава како земја кандидат да биде активен член“, истакна Манчевски.
Oд економска гледна точка, придобивките за нас како држава се јасни. Членството што се плаќа за учество во оваа програма е со помал износ од годишните трошоци коишто ги имаме за приклучок кон TESTA-ng мрежата.
Откако ќе се комплетира оваа програма, истата ќе биде трансформирана во поголема програма наречена Digital Europe, и ќе се занимава со поголемата слика на дигитализација во ЕУ. Тука ќе се разгледуваат и носат идните стандарди и насоки за развој на дигиталната агенда. Северна Македонија активно ќе учествува во дефинирањето на идните решенија и стандарди од ова поле кои понатаму и ние ќе ги имплементираме и примениме.
Комесарот Хан, потенцираше дека на овој начин, со влегувањето на Северна Македонија во оваа програма, ние сме веќе дел од Европската Унија. Тој ги поздрави напорите на нашата држава за приклучување кон ИСА2, а како потврда за тоа е отстапката што ја прави ЕУ, овозможувајќи и на Северна Македонија, полноправно членство во оваа програма.
Согласно препораките за справување со Ковид-19, потпишувањето беше преку видео конференција. Како што потврдија и Манчевски и Хан, ова е уште еден пример за важноста на дигиталните бенефиции за непречено одвивање на активностите, дури и во време на вонредна состојба.
