пишува: РИБАРО
Екипата на АХА, дојде до еден многу интересен документ од нашата историја, скриен на тајните полици од Архивот, кој за среќа сѐ уште не е потонат во водите од реката на префектот Варда Склир.
Во досието е документирана една подзаборавена битка во која искубаниот генерал Валдемар T’руски со својата глутница ја напаѓа Првата линија на Фронтот.
Глутницата волци предводена од генерал Валдемар T’руски доби директна наредба од остатоците од Црно-црвената легија, да навлезе длабоко на територијата на Атлантида. Црно-црвената лавовска легија непрестано се обидува да ја заземе слободната Република што си ја вратија под свое демократските Атлантиѓани, откако по повеќе од една деценија улични борби, конечно устоличија демократска република.
Откако чопорот волци ја запоседна легијата, од некогашната лавовска легија останато е само името и ништо повеќе, но и таква искубана ја има моќта од своите дувла да крои и прекројува интриги и организира напади против Слободната Република Атлантида. Она што не пресметала глутницата на чело со генералот Валдемар T’руски, е тоа што на Првата линија на Фронтот ќе ги пречекаат прекалени борци слободари. Тие слободари безрезервно се бореа за слобода на Атлантида, во услови на тортура од црните генерали скриени под пазувата на лешперските искубани волчиња што сакаат да бидат лавови.
Валдемар го кренал мечот и наредил офанзива. Искубаните волци, под команда на искубаниот генерал се здадоа во јуриш…
И, токму во тие драматични моменти влезе еден налутен архивар и ја растера екипата на АХА. Летаа фасцикли и регистри на сите страни. Многу беше лут архиварот, многу, ама екипата успеа да му избега.
После тоа и други служби, архивари и црни легиски остатоци ја прогонуваа екипата на АХА за упадот во потонувачкиот Архив, но исто како и слободарските Атлантиѓани и екипата на АХА храбро одолева на нападите и успева да задржи барем фрагмент од документот каде е опеана борбата на слободарите против генералите.
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK