Советникот на премиерот во Владата, Фатмир Битиќи, на денешната прес конференција одговори на прашањето на Фронтлајн во врска со тврдењата на ВМРО дека во првите три месеци се потрошени 120 милиони евра од буџетот за изборни цели.
За да биде соодветен одговорот треба реално да видиме на што тоа се должи. Вистина е дека од планираниот дефицит за годинава од отприлика 16 милијарди денари, потрошени се речиси 43%, или во бројки 7,4 милијарди денари. Тоа е отприлика 25% повеќе од потрошениот дефицит во истиот квартал минатата година, кога имавме 18% потрошени од дефицитот или 3,2 милијарди денари.
Разликата меѓу двата квартали е 4,2 милијарди денари, но мислам дека граѓаните треба да сфатат каде овие 4,2 милијарди се потрошени. Во периодот јануари – март, посебно март со кризата, приходната страна на Буџетот беше намалена за отприлика 1,9 милијарди денари (5% помалку приходи од планираните за целиот квартал), и секако тоа се планирани расходи на другата страна. Затоа буџетот е искористен соодветно за пополнување на оваа дупка во приходната страна.
Дополнително, во периодот јануари – март 2020, имаме за 400 милиони денари повеќе реализирани капитални инвестиции во споредба со лани, т.е во овој квартал имаме 8,5% реализација на капитални инвестиции, што е за 2,3% повеќе од првиот квартал во 2019, изјави Битиќи.
Второ, имаме за 800 милиони денари повеќе платени субвенции наспроти истиот квартал лани, што во проценти е 3% повеќе од кварталот јануари – март 2019.
На крај советникот нагласи дека не е добро да се споредуваат двата квартали, затоа што со сите законски измени од минатата и оваа година, сите расходи се законска обрска на Владата. Кварталите се неспоредливи затоа што оваа година имаме покачени плати во образование, во Армијата, Полицијата, здравството. Замислете во овој момент со оваа ситација да ги имавме истите плати. Какви ќе беа реакциите од другата страна. Најголемиот товар моментално паѓа на овие четири сегменти.
Советникот Битиќи додаде и дека имаме зголемени пензии, поголеми социјални давачки и затоа нагласува дека споредбите на овој квартал со претходниот се неспоредливи и дека буџетскиот дефицит кој што е направен во овој период е соодветен на одговорот на кризата и секако, тој ќе продолжи да биде соодветно користен за најмалку да падне товарот на самите граѓани и на оние кои ја носат одговорноста.
А. Н. С.
