Министерот соопшти дека со 33 нови случаи, вкупниот број дијагностицирани со Ковид-19 во нашата земја од почетокот на епидемијата изнесува 1.572, бројката на оздравени пациенти е 1.079, на починати е 89, а во моментов бројот на активни случаи во земјата изнесува 404.
Стигнаа 20 монитори, уште дополнителни од нивната вкупна помош 25.000 маски N95, 100.000 хирушки маски, 750.000 пара раквици, 10.000 заштитни очила, со што вкупната вредност на помошта од ЕУ заедно со респираторите, кои стигнаа или ќе стигнат, достигна 3,2 милиони евра, додаде министерот за здравство Венко Филипче.
Тој посочи дека ќе стигнат и 20 респиратори од Норвешка, а со 20-те респиратори од ЕУ и со 15-те потврдени преку УНДП има значајно зголемување на бројот на респираторни машини.
Филипче додаде дека тоа е многу повеќе од две третини од вкупниот број респиратори со кој располага земјава, тие соодветно ќе се распределат и тоа е едно значајно зајакнување на здравствен систем.
Бројките на заразени во следните денови ќе бидат клучни во носење одлука за евентуално олабавување на мерките и полицискиот час.
Вакцинацијата која е предвидена за 2021 најверојатно ќе биде единствениот начин на најсигурна заштита од вирусот, на светско ниво.
Во врска со повторното отворање на градинките, уште пред неколку дена беше најавено од министерството дека ќе се спроведува скрининг тестирање на одредени групи граѓани кои би можело да се асимптоматски, а кои заради работното место се поизложени на вирусот, како полиција, лекари, вработени во градинки итн.
За порастот на бројот на заразени во Велес, министерот вели дека станува збор за одреден кластер.
За ситуацијата во Куманово, исто така ќе се почека неколку дена, доколку е намален трендот на заболени, секако дека и таму мерките би биле поблаги.
Со 33-те нови случаи денес во земјава, имаме скок на новодијагностицирани пациенти и тоа ќе го следиме наредните денови, за да видиме дали е случајност, некаква варијација или ќе биде некаков тренд.
– Ако се сеќавате, во неколку наврати имавме слични сценарија со значајно мал, но и значајно голем број заболени, во еден момент имаше и над 100 новодијагностицирани. Во таа смисла во текот на утрешниот ден, во сабота, ќе ги анализираме новодијагностицираните случаи и ќе носиме заклучоци на што се должат тие.
Засега остануваат на сила сите мерки и апелирам сите граѓани да продолжат доследно да ги почитуваат, потенцира Филипче.
А. Н. С.
