Портпаролот на СДСМ Костадин Костадинов во денешното соопштение за јавноста ги изнесе клучните приоритети на партијата во однос на престојните избори, и најави дека согласно законските рамки изборите ќе се одржат 22 дена по истекот на вонредната состојба, и покрај опструкциите од Мицкоски и ВМРО-ДПМНЕ.
„Актуелната ситуација бара одговорност, зрелост и совесност од сите, вклучително и од политичките субјекти во нашата држава.
За СДСМ како одговорна партија во овој важен период има три клучни приоритети -заштита на здравјето на граѓаните, брза трансформација на економијата и функционални институции, како гарант за силна демократијата.
По ставањето на пандемијата под контрола, силно се посветивме на носење економски мерки за брза трансформација на економијата. Сега, потребно е градење на функционални и институции со целосен легитимитет. Затоа потребни ни се парламентарни избори во првиот можен рок.
Според Комисијата за заразни болести и според надлежните институции, создадени се услови за одржување на предвремените парламентарни избори, секако со целосно почитување на протоколите за заштита на здравјето.
Дека има услови за одржување на изборите, говори и позитивниот одговор на ОБСЕ/ОДИХР дека се подготвени да продолжат со набљудувачката мисија на парламентарните избори во Република Северна Македонија.
Согласно законските одредби и Уредбата со законска сила на Владата, изборите треба да се одржат 22 дена по завршување на вонредната состојба. Во случај таа да заврши на 30 мај, изборите треба да бидат на 21 јуни.
имаме распуштено Собрание за чие распуштање гласаа сите политички партии, имаме техничка Влада по пржински модел, на крајот имаме и распишано избори од страна на претседателот на Собранието, кои беа одложени заради коронакризата. Оттука нема никакви пречки процесот да продолжи и изборите да бидат на 21 јуни.
Не смееме и со сигурност нема да дозволиме неодговорното и незрело однесување на ВМРО-ДПМНЕ и Христијан Мицкоски да ја втурне нашата држава во лош правец, само затоа што тие се плашат од изборно соочување.
Токму Мицкоски се согласи за избори на 12 април. Токму ВМРО-ДПМНЕ гласаше за распуштање на Собранието, поддржаа распишување на изборите, влезе во техничка влада, поднесе пратенички листи, стави печат на кандидатските листи, учествуваше во жребувањето и дури имаат и свое бројче на гласачкото ливче.
Сега, Мицкоски единствено може да бира дали ќе води изборна кампања или нема да води изборна кампања, а неговата партија во секој случај ќе се најде на избирачкото ливче.
СДСМ е одговорна партија и како и досега дава шанса на консензусот за важни прашања, но доколку нема договор и доколку продолжи незрелоста и неодоговорноста на Мицкоски, тогаш по сила на Закон, изборите ќе се одржат на 21 јуни, односно 22 дена по истекот на вонредната состојба на 30 мај, во случај да не се продолжи.“
Избори мора да има заради здравјето на граѓаните, заради новата економија и заради функционални институции, велат од СДСМ.
