Додека се противи 10. парламентарни избори да завршат во првата половина на летото, со образложение дека здравствената криза не е под контрола и нема услови за кампања, опозициското раководство снима спотови во рамки на кампањата „Летувајте во Македонија, на езеро или на планина“, анализира 360 степени.
Оперскиот пејач Игор Дурловски, кој е носител на листата на ВМРО-ДПМНЕ во петтата изборна единица, и Владо Мисајловски, кој е носител на листата во втората ИЕ, се приклучија кон кампањата што ја почна партискиот лидер Христијан Мицкоски за летување во земјава.
Дурловски и Мисајловски, а можеби и другите носители на листи на ВМРО-ДПМНЕ, се „главни актери“ во спотови во траење од по неколку минути, снимени на локации во рамки на нивните изборни единици.
Додека ВМРО-ДПМНЕ се противи десеттите парламентарни избори да завршат во првата половина на летото, со образложение дека здравствената криза предизвикана од коронавирусот не е под контрола и дека нема услови за кампања, партиското раководство снима спотови во рамки на кампањата „Летувајте во Македонија, на езеро или на планина“.
Последниот предлог на ВМРО-ДПМНЕ е дека изборите може да се одржат на крајот на летото, односно во последните две недели на август или на 13 септември.
Пред неколку дена ВМРО-ДПМНЕ го промовира спотот на Мицкоски во рамки на оваа „туристичка кампања“, а денеска се објавени и спотовите на Дурловски и на Мисајловски, кои се претставени како носители на листи во соопштенијата на партијата.
Спотот во кој се појавува оперскиот пејач Дурловски е снимен на локации во неговата изборна единица, односно во Битола и Охрид… Неговата противкандидатка од СДСМ во петтата ИЕ е заменик-претседателката на СДСМ, Радмила Шекеринска.
Спотот на Мисајловски е снимен на локалитетот Кокино, близу Куманово – најголемата општина во рамки на втората изборна единица, каде што носител на листата е потпретседателот на ВМРО-ДПМНЕ, наспроти техничкиот премиер Оливер Спасовски, кој е носител на листата на СДСМ во „двојката“.
Во другите четири изборни единици носители на листите на ВМРО-ДПМНЕ се Гордана Силјановска во „единицата“, наспроти Никола Димитров од СДСМ; Игор Јанушев во третата ИЕ контра Љупчо Николовски; во „четворката“ Александар Николоски треба да му се спротивстави на Зоран Заев, а во шестата ИЕ е Дафина Стојаноска наспроти лидерот на Беса, Билал Касами, кој влезе во коалиција со СДСМ.
