Режисерката Нела Витошевиќ најави необичен театарски подвиг заедно со одбрани колеги кој за 10-тина дена ќе биде достапен за публиката. Имено, станува збор за театарска претстава која учесниците целосно ја подготвиле во услови на изолација, секој од дома, по започнување на полицискиот час. Претставата „Илузии“ е според мотиви од истоимената драма на Иван Вирипаев, а екипата од претставата воопшто не се имала сретнато во живо додека траело спремањето.
Драга публико,
Сакам да ве информирам дека во изминативе месец и пол дена, јас, Драгана Лошкова, Ивана Павлаковиќ, Никола Настоски и Исмет Шабановиќ, секој ден после полицискиот час, се собиравме на онлајн платформите за конференциски разговори, и правевме проби за првата онлајн театарска претстава на Wonderland Theatre со наслов Илузии. Дискутиравме, споделувавме сознанија и информации поврзани со новите глобални околности и решивме да експериментираме со театарски средства во виртуелниот простор и да видиме што ќе добиеме како резултат на ова истражување.
И покрај тоа што во моментов ни е оневозможена присутноста и допирот со публиката во живо, сепак на ова гледаме како на ново време на чиј предизвик сакавме и имавме органска потреба да одговориме.
Доколку не ви се допаѓа формулацијата „онлајн театарска претстава“, може ова наше дело да го ословите како вам ви одговара. Во секој случај ние поминавме низ ист процес како за било кој театарски проект, со таа разлика што претставата ја создаваме во комплетно специфични околности на домашна изолација.
Екипата се нема сретнато во живо. Целата комуникација и создавање на претставата се правени и сѐ уште се прават онлајн.
Ако се остане по план, очекувајте ја премиерната изведба за 10тина дена. Ќе бидете информирани со време. Особено ми е драго што по прв пат ќе можам сите да ве поканам на премиера!, напиша Витошевиќ во најавата преку пост на Фејсбук.
A. H. C.
