Министерството за здравство информира за последните промени околу состојбата со Ковид-19 кај нас, преземените чекори во одредени посериозни ситуации, текот на скрининзите, и повторно упатува апел за следење на мерките и препораките за заштита.
Во Штип се затворени шест конфекции, дадени се 55 решенија за самоизолација, во текот на следните денови ќе се тестираат вкупно околу 600 вработени. Досега се направени 100 тестирања.
Огромен број контакти од вкупно дијагностицираните се во рамки на десет семејства, и тука се прават интервјуа, се ставаат луѓе во изолација, и се тестира согласно ризикот кој епидемиолозите го проценуваат од анкетите.
Во однос на скринингот, во приватен дом за стари лица кој што има објекти во Ченто и Кадино, во едниот се позитивни две штитенички, а во другиот тројца вработени. Анализирани се сите контакти и дадени решенија за изолација.
Во однос на останатиот скрининг, продолжува во градинките. Има информација за позитивен полицаец од пограничната полиција, од странство, кој после враќањето во Унгарија бил тестиран и е позитивен и согласно тоа вчера се направени анкети и 30-ина странски полицајци кои што се на јужната граница и 30-ина наши полицајци кои биле во контакт со полицаецот кој заминал, ќе бидат денеска тестирани. Завршени се анкетите и се дадени решенија за изолација.
За рестриктивните мерки кои што ги најавивме во текот на вчерашниот ден, Комисијата ги разгледува. Сѐ уште нема одлука. Ги следиме информациите, бројките од денеска, ќе ги следиме и во текот на утрешниот ден и во текот на среда или четврток ќе се донесат соодветни одлуки.
Игнорирањето на вирусот и негирањето дека вирусот постои, нема да помогне во надминувањето на состојбата. Секаде во светот станува збор за имплементирање на истите мерки за заштита на населението и елиминирање или намалување на ризикот од ширење на заразата, маската, дистанцата, редовното миење, дезинфекција на раце – единствениот механизам кој што може да не заштити и како поединци, и како општество.
Состојбата на здравствениот систем, капацитетите на згрижување пациенти, големиот дел слободни болнички кревети, нискиот број заразени здравствени работници, бројот на слободни респираторни машини, познатите кластери, во изминатите неколку денови од анализа на контактите и сите други индикатори, укажуваат дека точно знаеме што се случува и имаме капацитет да се справиме и со овој бран на болеста. Има суштинска работа меѓу првиот и овој бран. Сега имаме друга состојба – имаме веќе знаење, ресурси, сериозно надграден здравствен систем, пишува во објавата на Министерството за здравство.
