Директорите на Државниот санитарен и здравствен инспекторат, Ирина Сотирова-Бухова, Државниот инспекторат за труд, Аљајдин Хавзиу и на Државниот пазарен инспекторат, Стојко Пауновски, одржаа заедничка прес-конференција на која информираа за актуелни прашања поврзани со инспекциските надзори за препораките и мерките на Владата за превенција и спречување на ширење на коронавирусот КОВИД-19.
Директорката на ДЗСИ рече дека будно се следи состојбата со кластерите на заразени со КОВИД-19, коишто се појавија во штипските конфекции, но и во правни субјекти во Тетово.
Заклучно со вчерашниот ден, во Штип издадени се 55 решенија за самоизолација на позитивни случаи. Исто така, се издадени и 169 решенија за лица коишто имале контакти со позитивно дијагностицираните. Направени се вкупно 100 тестирања, а во тек се уште 485 тестирања на вработени во веќе споменатите правни субјекти во Штип. Во Тетово имаме издадено 8 решенија за позитивно дијагностицирани, за домашно лекување и самоизолација и 54 решенија за самоизолација за лица со контакти со позитивно дијагностицирани. Заклучно со вчера во Тетово направени се вкупно 70 тестирања од предвидени 150, рече Сотирова-Бухова.
Таа додаде дека претходно наведените бројки се однесуваат само на неколкуте правни субјекти во коишто се појави КОВИД-19 во Штип и Тетово и во нив не се вклучени бројките на заразени од кластерите коишто се појавија во семејствата или други позитивни лица. Истовремено напомена дека правните субјекти и текстилните фабрики во Штип покажаа исклучително почитување на протоколите, со што веднаш по појавување на еден позитивен вработен престанаа самоиницијативно со производството.
Веста која во моментот кружи дека се извршуваат работни дејности, односно споменатите конфекции наводно ја продолжиле работата, најостро ја демантирам. Во овој момент, таму се присутни инспектори од ДСЗИ и од ДИТ, кои потврдуваат дека во просториите на конфекциите се врши тестирање, односно се земаат брисеви од вработените и присуството на вработените е само поради таа активност, потенцираше директорката на ДСЗИ Ирина Сотирова-Бухова.
Таа го повика Министерството за внатрешни работи, кое по Закон е задолжено, да врши контроли на лица кои имаат издадено решенија за изолација или самоизолација, бидејќи прекршувањето на изолацијата е казниво по Закон. Информацијата за издадените решенија на дневна основа од ДСЗИ се препраќаат до МВР.
