Управата за хидрометеоролошки работи и Аероклуб Скопје, на 20 мај ја имаа првата успешна интервенција за спречување на појава на град со помош на новата метода за засејување на облаците. Оттогаш се спроведени уште неколку интервенции, а последната е од вчера (6 јуни) со која е спречена појава на град во Пелагонискиот и Преспанскиот регион, соопштуваат од МЗШВ.
Тогаш беше извршено дејство врз градоносни облаци со авионско засејување во регионот југозападно од Велес, во Општина Чашка и во регионот западно од Прилеп во Општина Долнени.
УХМР и Аероклуб Скопје, изминатиов период извршија неколку успешни интервенции за спречување на град со помош на авионско засејување на облаците.
Министерот за земјоделство, шумарство и водостопанство на Република Северна Македонија, Трајан Димовски, во пост на Фејсбук соопшти за уште една успешна интервенција на УХМР за спречување на појава на град преку методата засејување на облаци, овој пат во Пелагонискиот и Преспанскиот регион.
Пелагонискиот и Преспанскиот регион во текот на вчерашниот ден (06.06.2020 година) беа зафатени од интензивна нестабилна воздушна маса која доаѓаше од југ.
Со цел да се спречи појава на град, Управата за хидрометеоролошки работи преку радарските центри Ѓуриште и Тополчани и Аероклуб Скопје во периодот од 10:15 часот до 16:33 часот извршија авионско засејување на градоносните облаци и потенцијално градоносни облаци со 135 палки, (една палка содржи 400г сребро јодит) со што е спречена појава на град во овие региони, стои во соопштението од Министерството за земјоделство, шумарство и водостопанство.
А. Н. С.
