Министерот за надворешни работи, Никола Димитров, во пост на Фејсбук ги истакна своите ставови за предвремените парламентарни избори, неизвесноста околу датумот, и како што и самиот вели „ценкањето“ дали ќе бидат на 5 јули или само 10 дена подоцна.
Стравот од изборен пораз, не е и не можеше да биде легитимна причина да се бега од волјата на народот. Посебно не за партија која постојано го узурпира и се дрзнува да зборува во името на народот. Како што не смееше да биде ниту легитимна причина за бојкот „ценкањето” дали изборите ќе бидат на 5 јули или десет дена подоцна.
Внимавајте, не зборувавме овде за немање услови за фер мегдан, за притиснати медиуми, за полиција ставена во функција на владејачките партии (полицијата впрочем ја води министер од редовите на опозициската партија), за пазарни инспектори кои се испраќаат по „непослушни” компании.
Ваква брутална негрижа за државноста, за уставниот поредок, за функционалноста и легитимноста на институциите во услови на здравствена криза е незамислива.
Не пуштај назад (читај повторно конституирање на Собранието), не пуштај напред кон избори, барај одложување, блокирај кредити потребни за справување со економските последици, разнишувај ја грижата за здравјето и санкционирањето на рестриктивните мерки, злоупотребувајќи го својот министер, а притоа обвинувај ја техничко-пржинската влада во која самиот учествуваш…
Не велам дека сите сектори совршено одговорија на предизвиците од пандемијата, но дали гледате за што всушност се работеше и каква беше оваа злоупотреба токму на пандемијата за државата да се држи во заложништво!? Каква врска има ова заробување на институциите со грижата за јавното здравје?
Затоа, потегот на Заев да излезе во пресрет на барањето за избори на датум по волја на опозицијата треба да се поздрави, како одговорен и државнички потег. Со тоа, останувајќи без ниту еден изговор, опозицијата конечно ќе се соочи со волјата на народот. Сакате избори на средината на јули? Повелете, напиша министерот Димитров во својот пост на Фејсбук.
