На денешната прес конференција одржана на кејот на Вардар, претставникот на Твоја Партија, Александар Тортевски, носител во ИЕ 1 на парламентарните избори, имаше обраќање до медиумите и јавноста.
Тортевски за медиумите изјави дека поводот за денешната прес конференција се изјавите на Дескоска, во која таа ги повикува граѓаните да гласаат само за партија која може да победи, како и на програмското ветување на Заев за најавените реформи во правосудството.
„Дескоска ги повика граѓаните да гласаат само за партија која што може да победи. Тоа е вулгарен пристап во политиката, тоа значи елиминирање на секаков поинаков начин на размислување и елиминирање на нови идеи на политичкиот пазар. Напротив, малите партии може да бидат сериозен колектив, и ние мислиме дека тоа е една изјава која што го поткопува плурализмот во Македонија, особено што е дадена од деклариран експерт за право и човек кој што се бори за еднаквост на граѓаните и различност на мислењата“, кажа Тортевски за изјавата на Дескоска.
„Втората изјава и програмско ветување што мене лично многу ме загрижува, а и целата Твоја партија, е ветувањето на премиерот во најава, Зоран Заев, дека реформите во Правосудството ќе ги започнат со 5% преиспитување на предмети. Значи 5% по случаен избор од предметите на секој судија наводно ќе му биле преиспитани. Загрижувачки е што партија со огромни ресурси стои зад такво ветување.
Ако треба да се прави анализа, треба да се направи анализа и на учеството на Министерството за внатрешни работи, Обвинителот и Судот. Трите субјекти да бидат преиспитани во секој конкретен случај, и наместо по случаен избор да се прави тоа, мора да се направи со преиспитување на сите предмети каде што била констатирана злоупотреба на правниот систем.
Имаат еклатантни докази за местење на предмети, местени за граѓаните да бидат осудувани врз основа на нарачки, и кога имаат таков сериозен показател тие поминуваат кон едно решение 5% со случаен избор. Тоа е само предизборна флоскула на која што ќе се налепат граѓаните кои што немаат доволно познавање, меѓутоа, тоа ќе значи да се продолжи политиката на неказнување, особено на високите функционери против што се бори практично Твоја партија“, образложи Тортевски на денешната прес конференција.
И. Ежова
