Потпретседателката на ДУИ и градоначалничка на Тетово во вечерашното гостување во отвореното студио на ТВ 24 рече дека ВМРО-ДПМНЕ не го гледа како партнер во новата влада. Во настапот Теута Арифи потенцираше дека ДУИ има црвени линии – континуитет на политиките постигнати со договорите со Грција и Бугарија и со Рамковниот договор.
Според Арифи, добро е креаторите на тој процес да седнат, да разговараат и да преземат обврска да продолжат во истиот правец.
„Ние на нашиот конгрес имаме јасно ставени линии и тие се однесуваа на Охридскиот, Преспанскиот, Договорот со Бугарија. Сметам дека ако се зборува за континуитет, се подразбира што е континуитет. Велам, додека нема официјален процес на разговори, комбинации може да слушате секакви, но јас мислам дека за ДУИ е важен тој процес на одржување на овие договори, апсолутно се поврзуваат со тие што ги креираа овие договори кои апсолутно ги поддржуваа и работеа на тие договори“, рече Арифи.
„Значи не гледате партнер во Белата палата“, праша новинарката Душица Мрѓа. Арифи кратко одговори: „Не“.
