Европската комисија (ЕК) објави дека постигнала договор со фармацевтската компанија Санофи и обезбедила набавка на 300 милиони вакцини против инфекцијата „ковид-19“.
„Предвидено е, откако вакцината се покаже како безбедна и ефикасна против ковид-19, Комисијата би имала договорна рамка за набавка на 300 милиони дози, во име на сите земји-членки на ЕУ.
Комисијата продолжува со интензивни разговори со други производители на вакцини “, се вели во соопштението на ЕК. Претседателот на ЕК, Урсула фон дер Лајен рече дека институцијата што ја предводи прави се што е во нејзина моќ за да им овозможи на Европејците брз пристап до вакцина што е безбедна и ги штити од коронавирус.
Таа најави дека договорот со Санофи е само првиот чекор и најави нови договори со неколку други компании. Европската унија брои околу 445 милиони граѓани, а договорот со компанијата Санофи за набавка на 300 милиони вакцини веќе опфаќа значителен дел од населението.
„Додека денес не знаеме која вакцина ќе функционира најдобро на крајот, Европа инвестира во најразлични портфолија кои ветуваат вакцина заснована врз различни типови технологии. Ова ги зголемува нашите шанси за брзо добивање ефикасен антивирусен лек. Вакцината би била навистина глобално добро “, рече Фон дер Лајен, додавајќи дека ЕУ е посветена на обезбедување пристап до поранливите земји, со цел да се најде начин за излез од оваа криза.
Европскиот комесар за здравство и безбедност на храна Стела Кириакидес истакна дека договорот со Санофи е првиот важен чекор во обезбедувањето еднаков пристап до вакцината за европските граѓани. „Безбедна и ефикасна вакцина против КОВИД-19 е најбезбедна стратегија за надминување на кризата. Затоа во последниве недели преговараме за унифициран пристап кон ЕУ, со цел да обезбедиме дози на ветувачки кандидати за вакцината “, рече Кириакидес.
На иницијатива на ЕК, во мај беа собрани скоро 16 милијарди евра, во глобална акција за универзален пристап до тестови, третмани и вакцини против коронавирус и за глобално закрепнување, пренесува Радио Слободна Европа.
