Повеќе милиони ученици во Италија ќе се вратат во училиштата на 14 септември, кога започнува новата учебна година во земјата, а италијанските здравствени власти воспоставија правила за спречување на ширење на Ковид-19, стравувајќи од нов бран зараза во есен.
Враќањето на децата во училиште за време на пандемија е важен чекор за Италија, првата европска земја што воведе строги мерки за карантин на целата територија на почетокот на март поради коронавирусот, и по околу три месеци постепено излезе од блокадата.
Италијанското Министерство за здравство и Високиот институт за здравство објавија упатства за спречување на ширење на коронавирусот, од идентификација на заразени ученици или наставници, до карантин.
Едно од правилата е семејството да ја проверува телесната температурата на детето секој ден пред да оди на училиште.
Доколку во училиштето постои сомневање дека ученик е заразен, се препорачува возрасно лице со хируршка маска на лицето да го изолира во одреден простор каде што ќе ги чека родителите, кои се предупредени откако ќе дојдат дома што е можно побрзо да контактираат со педијатар или матичен лекар кој ќе одлучи дали е неопходен тест за Ковид-19.
Доколку се појават симптоми кај наставници и други работници во училиштето, се очекува да се вратат дома и да се јават кај доктор.
Засега останува во сила одлуката, која беше критикувана, дека маските се задолжителни за деца постари од шест години кога престојуваат во затворен простор и кога седат на маса каде не е можно растојание од најмалку еден метар.
