Откако му се заблагодари за помошта што земјава ја добива од ЕУ во борбата со Ковид 19, премиерот Зоран Заев, на средбата со новиот евро амбасадор, посочи дека тој го почнува мандатот во време на планетарна криза без преседан. Зборувајќи за имтегративниот и реформскиот процес во пресрет на меѓувладината сресба, Заев, нагласи дека Северна Македонија е веќе на пат од кој нема враќање.
„На пат сме од кој нема враќање. Потрошивме премногу време на конфликти место на нивно решавање. Со секој чекор, со секое отворање на поглавје, со секој решен проблем работиме да го подобриме квалитетот на живот на секој граѓанин” , изјави Заев по средбата со новиот амбасадор на ЕУ, Дејвид Гир.
Изразувајќи задоволство од нацртот на преговарачката рамка, Заев се надева дека разговорите ќе дадат успешна завршница на министерскиот состанок на ЕУ на деветти ноември и наскоро ќе се одржи првата меѓувладина конференција во декември. Тој изрази уверување дека нашата земја неmа да дозволи да постојат нови причини за одлагања, пoтенцирајќи дека напорно ќе се работи и на внатрешните реформи и на добрососедските односи.
„Наша намера е да ја активираме брзата трака на преговорите по поглавја со целосно и безусловно исполнување на нашата ЕУ агенда. Нема да дозволиме причини за нови одлагања. За нас е прифатлив новиот принцип на реверзибилност доколку има деградација на демократскиот амбиент во нашата земја, но наша обврска е тоа да не се случи. Она што внесува оптимизам се сигналите од европските пријатели дека билатерaлните прашања не треба да бидат камен на сопнување во фазата на завршните преговори”, изјави Заев.
Имајќи предвид дека со соседна Бугарија веќе сме градиле добри односи и фактот дека сме партнери во северноатлантската алијанса, тој очекува дека и актуелните прашања ќе се надминат низ дијалог и духот на пријателството.
„Со Бугарија сме сојузници во НАТО и имаме заедничка обврска да ги градиме добрососедските односи. Духот на добрата волја и пријателство кој произлегува од Договорот за соработка и пријателство не обврзува да се фокусираме на зајакнување на односите на двете земји со почитување на правото на самопределувањето и самоидентификација како темелни европски вредности”, изјави премиерот Зоран Заев.
А. Зеќири
