– Градоначалникот на Град Скопје манипулира со целата јавност и со друштвата за заштита на животни кога вели дека со отворањето на така наречениот стационар ЛАЈКА ќе го реши проблемот со кучињата скитници на територијата на Градот, се вели во соопштението од ВМРО-ДПМНЕ.
Од таму додаваат дека Градоначалникот манипулира со јавноста и дрско лаже дека проблемот со бездомните кучиња е решен, како што самиот се пофали дека ова е само едно привремено живеалиште на бездомните кучиња, таму ќе се стерилизираат и потоа повторно ќе бидат пуштени на улицата
Постојат големи сомнежи со ова партиско јавно претпријатие Лајка, велат од опозициската ВМРО-ДПМНЕ, за кое сме сигурни дека е отворено парење на пари и за се останато освен на професионален стационар и третман на бездомните животни и решавање на долгогодишниот проблем во кој се соочува нашата метропола. Од ВМРО-ДПМНЕ истакнуваат дека на Скопје му треба стационар како во Европските Метрополи.
„Лајка“ не е само објект, тоа е еден сосема поинаков концепт во третманот на бездомните животни, истакна градоначалникот Шилогов на отворањето на стационарот за кучиња Лајка.
Со отворањето на новиот објект на стационарот за кучиња и спроведувањето на новата програма, ЈП „Лајка“ ќе биде првата алка во синџирот за хумано решавање на проблемот со кучињата скитници, како и намалување на нивниот број на скопските улици, информираат од Град Скопје.
„Градот Скопје е меѓу ретките градови, единствен во регионот кој заради посветеноста на овој проблем има сопствено јавно претпријатие, не сме веќе дел од „Комунална хигиена“ и во коешто ќе работат обучени луѓе. Капацитетот на објектот е некаде околу 100 кучиња, станува збор за убедливо најдобрите стандарди што се пропишуваат во оваа област. Секој од кафезите, односно целиот објект е со подно греење со цел на животните да им обезбедиме комоција, секој дел е засебен, тргнати се прифатилиштето и тргнато е приемното одделение. Можете да ги видите амбулантата, операционите сали, собата за интензивна нега, собата за постоперативен третман и карантинскиот дел и се надевам дека „Лајка“ ќе стане центар за вдомување на кучиња и ред други работи кои подразбираат еден многу повнимателен и поодговорен однос со овие животни – потенцира Шилегов, на отворањето на новиот стационар.
Тој додаде дека „Лајка“ ќе биде многу повеќе од обичен стационар, односно ќе значи дом за сите овие кучиња кои по игра на судбината немаат друг дом. Исто така, дека во блиска иднина „Лајка“ ќе значи истовремено и занемарливо мал број на кучиња на улиците што ќе води речиси до нула каснувања за луѓето.
Новиот концепт за третман на кучињата скитници не значи само ново ЈП и нов објект, туку воспоставување на систем на контрола на нивната популација која ќе подразбира вклучување на повеќе општествени чинители.
Ј. Ѓ.
