Aктуелниот градоначалник на Кавадарци и претендент за претседател на ВМРО-ДПМНЕ Митко Јанчев, доцна синојќа најави мирен протест за смена на Христијан Мицкоски од лидерската позиција на ВМРО-ДПМНЕ, пред седиштето на партијата
Денеска Митко Јанчев во изјава за Фокус, рече дека по консултации со министерот за здравство Венко Филипче и претседателот на Комисијата за заразни болести, д-р Жарко Караџоски, тие дошле до заеднички став, дека протестот не треба да се одржи во овој кризен период, кога бројките на новозаразени лица со корона вирус, секојдневно се во пораст.
– Се согласувам дека здравјето на граѓаните е на прво место. Се консултирав со Филипче и со Караџоски уште рано утринава, според нивните препораки дека протестот може да го загрози јавното здравје, решив да го одложам истиот. Но, тоа не значи дека отстапуваме од нашата цел, Мицкоски да замине од челната позиција во партијата. Ќе имаме конференции во повеќе градови, еден вид на онлајн протести, бидејќи партијата мора да застане на цврсти нозе – вели Јанчев.
На ФБ се огласи и Претседателот на патриотскиот институт на ВМРО-ДПМНЕ Александар Пандов.
Пандов се закани со организирање на контрапротест во исто време и на исто место како и најавениот претходно протест на Јанчев.
– Ќе ја искористам таа прилика на твое доаѓање во Скопје и ќе го повикам членството на ВМРО ДПМНЕ да дојде во исто време и на исто место, па ние да ти го кажеме нашето мислење за тебе!, се закани на ФБ Пандов кон Јанчев.
Аналитичарите на политичките прилики, велат дека тоа што Јанчев го откажа протестот ни малку не ја сокрива внатрешната поделба и постојани конфликти во редовите на опозициската партија. Веднаш по поразот на паралементарните избори во јули, видни членови на партијата јавно го повикаа Мицкоски да си поднесе оставка затоа што лидерот самиот изјавуваше дека ќе замине ако ВМРО-ДПМНЕ претрпи пораз.
