Со возила на Територијалната противпожарна единица, од раните утрински часови се дезинфицираат главните и најпрометните улици во Прилеп, а со цел поголема безбедност на граѓаните кои деновиве ги посетуваат здравствените установи, дезинфицирани беа и влезовите на Општата болница „Борка Талески“, Центарот за јавно здравје, Здравствениот дом и Службата за итна медицинска помош, информираат од Општина Прилеп.
Покрај теренската дезинфекција, во текот на денешниот и утрешниот ден стручни екипи ќе извршат темелна дезинфекција на работните простории во училиштата и градинките во градот и населените места.
„Ситуацијата со ширењето на коронавирусот во општината, добива сериозни размери, а од тие причини градоначалникот Илија Јованоски и Општината апелираат на доследно и строго почитување на пропишаните мерки за заштита. Граѓаните да не се групираат, да престане организирањето на забави во викендиците во близина градот, одржување на физичка дистанца во секојдневните контакти, редовно носење на заштитни маски, како и често дезинфицирање на рацете и работните површини, се основните начини за да се заштитиме себеси, здравјето на нашите најблиски и колективното здравје.“, апелираат од Општина Прилеп
