Светски познатата модна куќа Кензо на овогодинешната Париска недела на модата се претстави со колекција инспирирана од македонскиот документарен филм „Медена земја“.
Колекцијата на Кензо за пролет-лето 2021 е креирана од дизајнерот Фелипе Оливеира Баптиста, кому ова му е втора колекција за оваа модна куќа. Баптиста за Vogue и WWD изјавил дека голем дел од инспирацијата црпел од „Медена земја“, документарен филм кој е дело на режисерите Љубо Стефанов и Тамара Котевска, и ја раскажува приказната за пчеларката Атиџе Муратова која живее во рурална Македонија.
Главната цел на филмот е да се прикаже контрастот помеѓу Атиџе, пчеларка која ги почитува правилата на природата, и зема од медот само онолку колку што ѝ е потребно да преживее, и нејзините соседи кои ги исцрпуваат природните ресурси за личен профит, и со тоа ги убиваат пчелите и го нарушуваат екосистемот.
„Тоа е една од најстарите релации помеѓу човекот и природата. Сакав да креирам нешто што ќе ја опише кревкоста на ситуацијата во која се наоѓаме. Светот плаче.“ – изјавил Оливеира Баптиста за Vogue, повикувајќи се на пчеларството и на климатска криза со која се соочува светот.
На Париската модна недела колекцијата беше претставена на ревија на отворено, почитувајќи ги сите мерки за социјално дистанцирање наложени од новата вонредна состојба на пандемија. Овие протоколи, односно маските кои станаа дел од нашето секојдневие се уште еден фактор кој го инспирирал Баптиста.
Во време на пандемија кога се навикнавме да носиме заштита на лицето, дизајнерот разгледувал фотографии од пчелари и бил инспириран од „меката заштита“ што ја даваат нивните превези.
Баптиста сакал да ја интегрира својата работа со хармоничните и оптимистички аспекти на природата, теми кои се исто така клучни за Кензо. Тој строго користи пластика што може да се рециклира, работи со WWF за удвојување на глобалното население на тигри (заштитен знак на Кензо) и има голем број други еколошко-свесни проекти.
Но, наместо нежно, како што наложува модниот свет, дизајнерот сакал неговата колекција да погоди очигледен нерв во време кога природата се спротивставува, возвраќајќи ни со иста мера со која ние ја третираме. „Не знаеме ни од што да се плашиме и во што да веруваме. Целата идеја за заштита станува апстрактна“, изјавил Баптиста, сумирајќи го широкиот спектар на социополитичките проблеми со кои се соочува светот.
Покрај впечатливите пчеларски шапки и комбинациите за „стилски пчелари“, колекцијата содржи колоритни креации и облека со цветен дезен, лесни палта и шарени фустани. Но сепак, цветните принтови од архивите на Кензо, во оваа колекција се избледени за да изгледаат клинички и нејасни, предизвикувајќи ефект на замаглен поглед низ прозорец на дожд, како слика која се доживува кога сте затворени дома и изолирани од светот. Стилските палта имаат мултифункционални џебови кои може да завиткаат палтото и да го трансформираат во торба за ѓубре. На дно на тркалезните кожни чанти излегува посебна џиновска торба за шопинг.
Баптиста изјавил дека сликата на пчелар му дошла во моментот во кој човештвото преговара со екосистемот. Иако новата состојба предизвикува страв и вознемиреност, тој вели дека со оваа колекција сака да оди на едно повисоко ниво, каде се сонува за оптимизам и иднина, и се навраќа кон работите кои ни недостасуваат.
И.Е.
