Имам информација дека овој викенд се распарчува Македонија во Софија и се преговара за иднината на нашиот идентитет!“ – Оваа „вест“ вчера ја објави првиот човек на ВМРО-ДПМНЕ, Христијан Мицкоски, додека протестираше за оставка на премиерот Зоран Заев.
Имам информација дека овој викенд се распарчува Македонија во Софија и се преговара за иднината на нашиот идентитет! pic.twitter.com/u6lCSEFLlX
— Христијан Мицкоски (@MickoskiHM) November 28, 2020
Изјавата која не е наивна и објавена без информација од каде Мицкоски дошол до вакво сознание предизвика негодување кај македонскиот политички врв, но и кај бугарскиот европратеник Андреј Ковачев. Тој дури го нарече Мицкоски лажго и во изјава за БГНЕС рече дека со вакви лаги, Мицкоски ја уништува европската иднина на македонските граѓани.
Ковачев ја нарече изјавата на Мицкоски хистерична.
„Христијан Мицкоски лаже. Тој манипулира и секој негов збор е лага. Мицкоски се обидува да добие некакви почитички поени со измислиците што ги кажува. Тврди дека Бугарија сака да ја распарчи Македонија и ги плаши граѓаните, а тоа е апсолутна лага, измислица и глупост, категоричен е Ковачев.
Реакции пристигна и од владејачката СДСМ. Оттаму порачаа дека оваа изјава ги навреди Македонците и дека Мицкоски треба да му се извини на народот за изнесените лаги.
„Хистерија по сите дефиниции е карактеристика на нервно растројство. Откако призна за самиот себе си дека е хистеричен, Мицкоски ги навреди граѓаните, ги навреди Македонците, без срам и перде за хистеричен го прогласи целиот македонски народ. Тоа воопшто не е точно и Мицкоски е најсоодветно да се извини. Македонците не се хистеричен народ, хистеријата е само кај губитникот Мицкоски“, се наведува во партиската реакција.
Покрај изјавата која наиде на многу реакции, Мицкоски на вчерашниот протест пред Владата, во своето излагање рецитираше стихови од песната „Цветови“ на покојниот великан, академик Славко Јаневски.
Инаку, академик Јаневски на иницијатива на неговата партија ВМРО-ДПМНЕ, во 2013 година беше лустриран како соработник на тајните служби.
„В Тиквешко негде в некое село кај в слана тивко венеше цвете, убија дете“ рецитираше Мицкоски на почетокот на протестот и нагласи дека „не смееме да ги игнорираме пораките кои ни ги оставиле нашите големи луѓе“.
Цитатот од познатата песна „Цветови“ на Јанески се однесува на масакрот во селото Ваташа во Втората светкса војна.
Еден од најдобрите македонски романописци и поети Славко Јаневски, беше лустриран 13 години по неговата смрт, а за ваквата одлука имаше многу реакции од семејството на писателот, Македонската академија на науките и уметностите (МАНУ) и од јавноста.
Според МАНУ, постапката на Комисијата за верификација на факти против академик Славко Јаневски е удар врз македонскиот национален идентитет, уставниот и правниот поредок на Македонија.
Тогашната Комисијата за лустрација (Комисија за верификација на факти) не го објави неговото име, но наведе дека се работи за академик и писател познат по делото „Селото зад седумте јасени“. Досието на Јаневски се води под псевдонимот „Славјан“.
„Станува збор за писател, академик, кој пишувал за село зад седум јасени. Во периодот на шеесетите и седумдесетите години како информатор од идеолошки причини ги кршел човековите права на лица уметници, сликари, писатели и артисти…“, изјави Предраг Димитровски, портпарол на Комисијата за лустрација на 28.11.2013 година.
Според Комисијата, починатиот поет е лустриран затоа што соработувал со тајните служби и следел писатели и уметници, а пред тајните служби ги кодошел, а за некои тврдел дека пишуваат лоша литература. А Мицкоски, претседател на истата партија која го лустрираше Јаневски, го (зло)употреби токму човекот кој посмртно беше изложен на ѕидот на срамот на Лустрациска.
И. Зафировска
