Пандемијата со коронавирусот трае веќе со месеци, а се чини дека нема да заврши наскоро, барем не до пролет. Денеска започна вакцинирањето, и сите некако видовме светло на крајот на тунелот
Сите ние сме преплавени со информации, позитивни и негативни. Информации кои допираат до нас и ни ја менуваат мислата, а со тоа и погледот на светот. Преоптоварени со светската економија и политика, и со дневните случувања во нашиот паричник често забораваме да се грижиме за она што е најважно – а, тоа е нашето здравје.
Некако во последен период се по активно и по актуелно стана здравото живеење и здравиот начин на живот. Конзумирањето суплементи и органска храна стана наша реалност во растреперените денови што ги носи пандемијата.
Според многу екперти од областа на медицината и медицинската психологија, опасноста по јавното здравје која ја предизвика новиот коронавирус, неминовно ја подигна свесноста на јавноста за здравиот начин на живот.
На повеќе места во светот се забележуваат промени. Луѓето повеќе спортуваат, поздраво се хранат, ги оставаат цигарите, ја сфаќаат важноста на менталното здравје итн.
Доволно е само да погледнете што се случува на кејот на Вардар, или пак да разгледате некои од профилите за здрава храна и здрав живот на социјалните медиуми.
Др. Митов на својот сајт советува како да се задржат овие здрави навики кои што ги стекнавме во карантинот и во пандемијата. Ние пренесуваме дел од неговите совети:
• Пред сé, најдете си добар мотив и не се идентификувајте со изговорите! Цврстината на мотивот е можеби клучна во однос на тоа колку успешно ќе се справиме со некоја лоша навика.
• Комуницирајте ги вашите намери за позитивни промени со блиските луѓе – нивната поддршка ќе ви биде од особено значење.
• Почнете со менување на оние лоши навики кои наједноставно можете да ги промените – резултатите од нив ќе ве мотивираат и за посложените.
На пример, ако сте целосно физички неактивни, почнете со 15 минутна прошетка, тоа го може секој, тешко ќе се најде оправдување. Бидете свесни дека и најмалите промени, освен што водат кон поголемите, и самите по себе можат да бидат многу значајни за здравјето.
• Немојте да имате очекувања за пребрзи резлутати – ова е можеби најчестата грешка. Промената во навиките е маратон, а не трка на 100 метри. Целите секогаш треба да бидат високи, но и реални.
• Кога се работи за усвојувањето здрави навики во однос на исхраната – не си поставувајте драстични ограничувања, бидете рационални и не посегнувајте по компликувани здрави рецепти. На пример, обидете се да го зголемите количеството на свежа и полнозрнаста храна, нека ви биде близу половина од дневните оброци. Одберете начин на исхрана кој е здрав, а е погоден за вас. Не останувајте гладни. Ако сте гладни, промените нема да бидат трајни и успешни. Заборавете на диетите.
◦ Кога пазарувате, купувајте само здрави намирници – секако не онакви кои потоа никогаш нема да ги изедете.
