Десет македонски претпријатија го добија престижното Признание за македонски квалитет, кое традиционално го доделува Сојузот на стопански комори на Македонија под покровителство на претседателот на државата.
Годинава, настанот се одржа во претседателската резиденција „Вила Водно“, а наградите ги врачија претседателот Стево Пендаровски и претседателката на Сојузот на стопански комори Данела Арсовска.
Годинашни добитници се „Еви Интернационал“, „Терма лифт“, „Ваурон“, „Ми–комерц“,
За претседателот Пендаровски, признанието за македонски квалитет годинава има посебна тежина.
– Вие знаете најдобро, во овие тешки услови, колку напори вложивте за компаниите да опстанат, да ги сочувате вработените, да не кратите од нивните плати, а притоа, да го задржите квалитетот на производите и услугите што ги испорачувате. Затоа признанието за македонски квалитет оваа година има посебна тежина и сите добитници заслужуваат особена почит. Сакам најискрено да им честитам за постигнатото, верувам дека признанието за квалитет ќе биде мотив за уште поголеми успеси во иднина. Во овој контекст, посебно за одбележување е што сe води сметка признанието да го добијат економски субјекти кои се грижат за своите вработени. Се радувам што и оваа година избраните компании, кои се од различни области, се стремат кон општествена одговорност, технолошко унапредување и воведување на иновации во својата област, а при тоа не забораваат да ја чуваат и промовираат македонската традиција, истакна Пендаровски.
Според претседателката на ССК, овие ентитети демонстрираат упорност да ги реализираат своите идеи и покрај бројните предизвици со кои се соочени годинава.
– Потребно е континуирано да се поддржуваат сите кои се борат за подобра економска иднина и допринесуваат и во време на криза како оваа предизвикана од пандемијата. Убаво е да се видат светли примери и во оваа година која беше исполнета со предизвици, кои се доказ дека никогаш не треба да се откажете од градењето на сопствената успешна приказна. Македонските економски амбасадори, треба да се мотив во 2021 година сите заедно да делуваме да се креира подобро деловно опкружување и да им се помогне во нивната мисија со вредна и посветена работа, да бидат наш прозорец кон светот и гордо да не претставуваат со своите успеси. На овој начин се промовира и македонскиот идентитет во светот што во овие моментите е особено критично и важно, нагласи Арсовска.
Манифестацијата се одржува секоја година во знак на оддавање признание и промовирање на деловните успеси на македонските претставници на национален бренд за тековната година. Се доделуваат 10 признанија секоја година.
