Сите кои работат на новиот концепт на основното образование немаат лоши намери и се подготвени да ги слушнат сите експерти од сите области, вклучително и родителите и дечињата, и да го прифатат тоа што е најдобро за да стартуваме онака како што е најдобро за учениците и за нашите деца. Нема потреба да брзаме имаме доволно време по пат на дебата да извлечеме најдобар модел кој ќе биде во функција на образовниот процес на учениците, посочи премиерот Зоран Заев.
-Сите сфаќаме и потврдуваме дека ни требаат реформи во основното образование, бидејќи сите имаме деца или внуци или ќе имаме деца кои треба да тргнат во основно образование. Образованието постои заради децата, а не заради учителите, наставниците или професорите. Тие се тука и се драгоцени заради тоа што го пренесуваат своето знаење на децата. Ако тргнеме од принципот кај се гледам јас, што со моите часови, дали на факултетите ќе се одржат таквите катедри и наставни програми, а при тоа не ни се важни дечињата нема да стигнеме никаде, рече Заев во одговор на прашање по денешниот увид на вселувањето на Министерството за политички систем и односи меѓу заедниците во новата зграда.
Верувам, дека со новиот концепт никој нема да остане без работа.
-Сите соодветно ќе бидат распоредени и можеби ќе бидат 12 часа на настава, а осум час на општествени и социјални активности со што ќе имаат нова можност и перспектива. Сепак, критиката е добредојдена и министерката, јас и сите во Владата, ќе го издебатираме целиот овој процес и ќе ги видиме најдобрите сугестии кои што постојат и согласно тоа ќе одлучуваме, посочи Заев.
Еден дел од сугестиите, прецизира, велат да се оди пополека и да не се избрзува. Да се тргне од прво одделение, па следната година од шесто одделение за да видиме како ќе влијае новиот концепт на образование зашто е поедноставно да се почне од прво одделение, бидејќи имаат само учителка и професор по англиски јазик или по физичко, а од шесто одделение имаат по 12 до 13 наставници и професори.
-Можеби треба да дадеме подолго време за шесто одделение за да се издискутира до крај и да тргнеме од 2022 година, но ова не го кажувам како експерт, туку за да знаат сите дека јас, министерката за образование и целиот нејзин тим, експертската и работната група се подготвени да слушнат што е најдобро и да го прифатат тоа за да стартуваме онака како што е најдобро за учениците, потенцира Заев.