Комисијата за еднакви можности на жените и мажите на Собранието, заедно со Клубот на пратенички и во соработка со Мисијата на ОБСЕ во Скопје денеска ќе одржи онлајн презентација на наодите од анализата на Деловникот и Законот за Собрание од аспект на родот и различностите изработена од експерти на ОДИХР.
Оваа активност, како што соопшти собраниската прес-служба, е дел од Планот за унапредување на родовата сензитивност на Собранието 2020 – 2021, а наодите и препораките ќе му послужат на законодавниот дом за надградување на овие два документа со родово-сензитивни одредби.
Како што е најавено, поздравни обраќања ќе имаат претседателката на Комисијата за еднакви можности на жените и мажите Гордана Сиљановска-Давкова, претседателката на Клубот на пратенички Лолита Ристова, Цветанка Иванова, генерална секретарка на Собранието, Надика Рајаратнам, правен офицер од ОДИХР…
Покрај членовите и заменик-членовите на Комисијата и Клубот на пратенички, на презентацијата поканети се претседателите на Комисијата за деловнички и мандатно-имунитетнни прашања и Комитетот за односи меѓу заедниците, Панчо Минов и Арбана Пашоли, како и собраниската служба.
