АД „Пошта на Северна Македонија“ нити го поседува, ниту располага со Поштенскиот дом „Водно“. Од овие причини, Пошта не е одговорна за негово одржување, ниту пак има право или било каква можност да влијае за негово ставање во функција на било кој начин, се вели во демантот од АД Пошта на Северна Македонија.
„Во однос на објавите во дел од медиумите, како и на социјалните мрежи, а во однос на состојбата на Поштенскиот дом Водно, ве информираме дека објектот за кој се однесуваат написите се невистинити.
АД „Пошта на Северна Македонија“ во повеќе наврати ги има дематирано ваквите наводи, но со цел навремено, точно и кредибилно информирање на јавноста, повторно ги посочуваме следните факти:
Со одлука на Владата на Р. Македонија од 1996 година за делење на Јавното претпријатие за ПТТ сообраќај „Македонија“ – Скопје (Службен весник на Република Македонија бр. 72/96, поранешното претпријатие ПТТ „Македонија“ се дели на два правни субјекти, ЈП за поштенски сообраќај „Македонска пошта“ и ЈП за телекомуникации „Македонски телекомуникации“ – Скопје.
Управниот одбор на тогашното ЈП за поштенски сообраќај ПТТ „Македонија“ на 27.03.1997 год., носи одлука за усвојување на Делбен биланс со која се утврдува билансот на состојба на ЈП „Македонска пошта“ со состојба 31.12.1996 и билансот на ЈП „Македонски телекомуникации“ со состојба 31.12.1996 година.
Согласно тој акт, од тој момент, наведениот објект ПТТ одморалиште „Водно“ – Скопје припаѓа на „Македонски телеком“ АД – Скопје.
Врз основа на овие факти сакаме јасно да дадеме до знаење дека АД „Пошта на Северна Македонија“ од 31.12.1996 година нити го поседува , а ниту располага со Поштенскиот дом „Водно“, односно овој објект не е во наша сопственост и надлежност.
Од овие причини, Пошта на Северна Македонија не е одговорна за негово одржување, ниту пак има право или било каква можност да влијае за негово ставање во функција на било кој начин.“, стои во демантот.
