Антирасистичкото движење „Black Lives Matter“ е номинирано за Нобелова награда за мир во 2021 година, објави „Гардијан“, пренесува Цивилмедиа.мк.
Норвешкиот пратеник Питер Еиде ја оправда номинацијата со фактот дека движењето ги натера не само САД, туку и другите земји да обрнат внимание на проблемот со расизмот во нивните сопствени општества.
„Верувам дека еден од клучните проблеми со кои се соочуваме, не само во Америка, туку и во Европа и Азија, е продлабочување на конфликтот заснован на нееднаквост. Black Lives Matter стана многу важно глобално движење за борба против расната неправда. Активистите постигнаа огромен успех во подигањето на свеста за расната неправда“, наведе Еиде.
Движењето беше основано во 2013 година откако афроамериканецот Трејвон Мартин беше застрелан смртоносно, а убиецот остана неказнет.
