„Јавна соба“ и слични девијантни појави ни се случуваат заради тоа што голем дел на
млади луѓе не дискутираат за себе, за своите релации, за својата сексуалност во
училиште, рече министерката за образование и наука Мила Царовска во гостувањето
во „Само интервју“ на Канал 5 ТВ.
Царовска нагласи дека голем дел од учениците ниту дома не можат да дискутираат на
такви теми, поради неукост на родителите или социјални стеги.
„Има млади луѓе коишто се жртви на сексуално насилство од свои врсници и тоа никој не го превенира. Затоа што не се зборува. На сторителот на насилство најмногу му одговара да не се дискутира на овие теми. Ништо да не се зборува. Кога немате знаење, немате како да кажете ’не’“, рече Царовска, објаснувајќи дека токму во училиштето младите луѓе во пубертет треба да добијат вистински знаења за сексуално репродуктивно здравје, за род и еднаквост, за тело и слика за себе, за насилство, за врски и односи.
Министерката Царовска рече дека сексуалното образование не се воведува во второ
одделение и дека тоа беше лажна вест, туку дека ќе биде изборен предмет во деветто
одделение.
„Бидејќи е изборен предмет, наставниците коишто се подготвени да ги предаваат овие
теми, ќе поминат соодветна обука. Во моментов се држи интензивна обука во четири
пилот училишта кадешто треба да се воведе од наредна година пилотирање на изборен
предмет сексуално образование, во 9 одделение. Сите анкети покажуваат дека и
родителите и учениците и наставниците имаат потреба од овие теми во образовниот
систем во погорните одделенија. И така е поставен концептот“, посочи министерката
Царовска.
