Во земјава до вчера против Ковид-19 се вакцинирани 764 здравствени работници. Имунизацијата на здравствените работници со вакцината од производителот „Фајзер“ се одвива во модуларната болница на Клиниката за инфективни болести во Скопје, каде се поставени шест вакцинални позиции и се работи во две смени од 8 часот наутро до 20 часот, од понеделник до сабота.
Министерот за здравство Венко Филипче вчера изјави дека се очекува до крајов на месецов да пристигнат и останатите вакцини.
– Веќе добро функционира системот на закажување, близу 95 илјади граѓани се пријавени преку сајтот vakcinacija.mk или преку матичните лекари. Од нив, 44 илјади се граѓани на возраст над 70 години со хронични болести, значи се таа прва приоритетна група на граѓани која треба да бидат вакцинирани по медицинскиот кадар. Веднаш кога ќе пристигнат вакцините, за разлика од сегашните вакцини тие ќе бидат дистрибуирани до сите вакцинални пунктови во земјава и ќе започне масовното вакцинирање на населението, рече министерот Филипче.
Тој посочи дека ќе се направи проценка и дали треба да се набават и содветни количини од руската вакцина против Ковид-19.
Премиерот Зоран Заев вчера изјави дека земјава нарачала толку вакцини против Ковид-19, колку што Комисијата за заразни болести, според нејзината проценка, оценила дека е доволно за да се постигне колективен имунитет.
– Така што дефинитивно сме направиле чекори, сме потпишале договори, некаде авансно сме платиле или слично за да ги обезбедиме тие количини. Ако продолжиме да порачуваме вакцини „Спутник“, следна веројатно е „Астра Зенека“, па нови количини од „Фајзер“, па нови количини од „Синофарм“ и ќе се затекнеме да има пет милиони вакцини во државата. Тоа е недозволиво заради рационалноста и наменското трошење на јавните пари. Затоа сме направиле договори толку колку што имаме потреба согласно националниот план за вакцинација на граѓаните во Република Северна Македонија. Ако се откаже дел од нарачките и се анулира дел од нарачката веројатно следни за нарачка ќе бидат токму „Спутник“ вакцините, рече Заев.
Вчерашните податоци на Инстиитутот за јавно здравје покажуваат благ пораст на бројот на заболени од Ковид-19. Според вчерашниот извештај, во претходните 24 часа се евидентирани нови 449 случаи на заболени од Ковид-19, 227 оздравени пациенти и 10 починати лица.
Бројот на активни случаи во земјава изнесува 6.735 од кои 2.952 се во Скопје. Вкупниот број пациенти позитивни и суспектни на коронавирусот кои се лекуваат на инфективните оддели во низ земјава е 622, има околу 420 празни болнички кревети во ковид-центрите.
Од почетокот на епидемијата со коронавирусот во нашата земја вкупно се регистриарни 99.031 заболени лица, бројот на оздравени пациенти е 89.249, а на починати е 3.047.
