Министерката за труд и социјална политика, Јагода Шахпаска, денеска го посети објектот „Синоличка“ од кумановската градинка „Ангел Шајче“ чиишто капацитети се
Министерството вложило средства за проширување на објектот кој ќе го користат 37 деца во две групи, јасли од девет до 18 месеци и деца од три до шест години во билингвална паралелка на македонски и на албански јазик.
Општина Куманово вложуваше во подземната инфраструктура, установата во врати, прозорци, приодни патеки, ограда.
– МТСП заедно со Владата сериозно вложува во претшколското образование на најмладите, особено преку изградба на нови градинки, проширување на постоечките капацитети, меѓутоа и во вложување на професионалните компетенции на вработените, стручните кадри кои работат со најмладите. Свесни сме за значењето што претшколското воспитување и образование го има во изградбата на идните градители на нашето општество, изјави Шахпаска.
Таа потенцираше дека Владата и општина Куманово заеднички вложуваат во проекти во подобрување на услови за престој на најмладите, посочувајќи, дека концептот „Едно општество за сите“ функционира во Куманово.
– Тоа е една успешна приказна за поздравување, затоа што убавината на општеството ја даваат различностите кои го креираат тој мозаик. Имено, директорката ме извести дека тука ќе профункционира трета билингвална група каде што децата и Македонци и Албанци ќе се дружат во оваа група заедно, за нивното воспитување и згрижување ќе се грижат воспитувачки кои говорат македонски и албански јазик, изјави Шахпаска.
На ниво на кумановската градинка функционираат уште две вакви групи, и македонско-албанска и македонско-српска група, посочи министерката и додаде дека тоа овозможува децата да го учат јазикот на другарчето кое доаѓа од друга етничка група.
Шахпаска најави дека ќе работат вакви проекти и истакна дека во овој објект само едно дете било заболено од Ковид-19 што, според неа, го покажува одговорното однесување на вработените и почитување на мерките. Таа посака успешна работа на установата, а на градоначалникот проекција на нови капацитети.
– Да го исполниме нашето ветување пред граѓаните дека до 2024 година, 60 проценти од нашите дечиња од предучилшна возраст ќе бидат сместени во градинки, рече Шахпаска.
Градоначалникот Максим Димитриевски се заблагодари на сегашниот и претходниот министер во Владата, за вложениот напор за проширување на објектот. Тој истакна дека општината вложила во подземната инфраструктура.
– Целта е да се зголеми капацитетот, да се зголеми бројот на слободни места во детските градинки во Куманово. Ја користам приликата да се заблагодарам на директорот, на вработените во градинката за придонесот кој го даваат за згрижување на нашите најмали, изјави Димитриевски.
Градинката „Ангел Шајче“ во Куманово има осум објекти и два центри за ран детски развој и со сегашното проширување капацитетот се проширува од 1.191 на 1.228 деца, конкретно во овој објект од 127 на дополнителни на 164 деца.
извор: МИА
