Односите и соработката меѓу Северна Mакедонија и Хрватска се во постојана нагорна линија и во последните три децении континуирано се надградуваат со зајакнување на политичкиот дијалог, економската соработка, културната, трговската и туристичка размена. За тоа придонесуваат и нашата заедница во Хрватска и на хрватската во земјава, кои преку низа активности остануваат во постојан контакт со својата матичната држава, култура и јазик, а воедно придонесуваат во квалитетот на нашите одлични билатерални односи и соработка, соопшти Министерството за надворешни работи.
Заменик-министерката Фатмите Исаки денеска имаше средбата со Звонко Милас, државен секретар во Државната канцеларија за Хрватите надвор од Хрватска. Двајцата се копретседавачи (од македонска и од хрватска страна) на Меѓувладината мешовита комисија, која го следи остварувањето на малцинските права, согласно со Спогодбата што двете држави ја потпишаа во 2007 година.
– Го поздравивме фактот што двете влади имаат многу позитивен однос кон прашањата за малцинствата кои претставуваат комплексни теми. Малцинствата ги споделуваат истите проблеми со кои се судираат сите граѓани во една држава – почнувајќи од актуелната пандемија до социоекономските прашања, но, истовремено имаат и дополнителни предизвици поврзани со зачувување на нивниот културен и национален идентитет, а пред се заштитата на културното наследство, образование и негување на мајчиниот јазик. Факт е дека државјаните на Република Северна Македонија кои живеат во Хрватска се исклучително задоволни од остварените права и ние како нивна матица сме благодарни за поддршката која Хрватска ја дава во оваа смисла, рече Исаки.
Таа посочи дека на последната средба на Меѓувладината мешовита комисија во Загреб на 8 октомври 2019 година било оценето дека има позитивен исчекор во исполнување на преземените обврски од македонска страна што дава поттик и ентузијазам, како што вели, да се осмислуваат и спроведуваат активности што ќе ја продлабочат соработката во оваа сфера.
– Честите средби на членовите на Комисијата, како денешната, покажуваат дека постои интерес од страна на нашите влади процесот да оди напред. Затоа однапред се радувам на претстојната петта средба во Скопје, за која верувам дека во конструктивна атмосфера ќе одговориме на поставените задачи и заеднички стремежи, рече заменик-министерката Исаки.
извор: МИА
