Министерката за образование и наука Мила Царовска и директорот на Фонд за иновации и технолошки развој Коста Петров, денес го објавија јавниот повик “Предизвик за млади истражувачи #4 – зелени проекти”, чија цел е поттикнување на креативното размислување кај децата и поддршка за истражувачки проекти базирани на научен метод.
Предизвикот се спроведува по четврти пат и е дел од концептот кој го развива ФИТР – “Фонд за млади умови”.
„Политиките на државата насочени кон поддршка на младите и развој на нивниот потенцијал во последно време имаат една поинаква димензија, различен концепт и многу поголема енергија. Учениците основци и средношколци, студентите, младите истражувачи и научници сега се навистина во фокусот на институционалните заложби и тоа е видливо, токму преку обезбедувањето на повеќе финансиски средства и бројни можности какви што порано не биле достапни, а една од нив, како мерка од стимулативен карактер е токму овој Предизвик за млади истражувачи“, рече Царовска, информирајќи дека досега преку трите објавени повици биле поддржани 90 училишни проекти во кои учествувале повеќе од 500 ученици и наставници од целата држава.
Таа очекува и оваа година да има голем интерес за учество на повикот, затоа што, како што рече познавајќи ја креативноста на младите умови во нашите училишта и желбата да придонесат за нивната средина да биде подобро место за живеење во иднина, убедена сум дека ќе пристигнат голем број иновативни проекти.
Повикот е наменет за сите основни и средни училишта, кои можат да аплицираат со истражувачки проекти од областа на природните и техничките науки, организирани во тимови од пет до десет ученици предводени од еден до двајца ментори. Процесот на истражување треба да се основа на „научен метод“, односно да вклучува формулација, тестирање и потврда/модификација на хипотеза по пат на експеримент и набљудување, а резултатите од истражувачкиот проект треба да бидат применливи во зачувување и унапредување на животната средина и биодиверзитетот.
“Младите и нивниот креативен потенцијал се генератор на економскиот развој и иднината на нашата земја. Со овој предизвик, на младите истражувачи сакам да им порачам дека нашата земја нуди перспективни можности и услови за развој на нивните иновативни идеи и иницијативи. Ги охрабрувам сите ученици да бидат упорни, храбри и да истражуваат, додека ние како Фонд ќе ги наградиме нивните труд и посветеност. Започнете со работа на вашите соништа и креирајте успешен пример за останатите истражувачи” изјави Коста Петров, директор на Фонд за иновации и технолошки развој.
Вкупниот фонд за овој предизвик изнесува 3.000.000 денари, а максималниот буџет за поединечен предлог проект треба да изнесува до 200.000 денари. За наставниците кои ќе ги водат ученичките тимови, ќе биде обезбедена награда во износ од 30.000 денари, наменети за набавка на дигитална опрема применлива во наставниот процес.
Предност ќе имаат проектите со интердисциплинарен карактер, кои предвидуваат инклузивен пристап во формирањето на тимовите, односно имаат еднаква родова застапеност, вклучуваат деца со различна етничка припадност, деца со посебни потреби, деца од различни возрасти и слично, и се поднесени од училишта од рурални средини.
Предлог проектите кои ќе пристигнат во рамки на јавниот повик “Предизвик за млади истражувачи – зелени проекти” ќе се оценуваат според квалитетот на проектот, применливост на резултатите од истражувањето, усогласеност на предлог проектот со целите на јавниот повик и капацитет на проектниот тим.
Со цел да ги поддржи тимовите во процесот на подготовка на предлог-проектите, Фондот ќе организира повеќе инфо-настани. Предизвикот е отворен до 20.04.2021 година. Сите дополнителни информации, можат да се добијат на: www.fitr/predizvikzamladi
