По доставена информација од страна на полицијата до надлежен државен инспектор за животна средина со седиште во Гостивар, за излевање на темна супстанца во Дебарско Езеро, која што предизвика угинување на жив свет во езерото, инспекторот од државниот инспекторат и полицијата доставиле предмет до Основното јавно обвинителство во Дебар.
„На 20-ти март до надлежен државен инспектор за животна средина со седиште во Гостивар беше доставена информација од страна на полицијата за излевање на темна супстанца во Дебарско Езеро, која што предизвика угинување на жив свет во езерото.
Со цел навремено обезбедување доказен материјал, инспекторот даде насоки на полицијата за правилно земање на мостри од езерото и од соодветни локации долж канализациската мрежа. Мострирањето, односно земањето примероци, беше спроведено во текот на денот.
На 22-ри март инспекторот беше на терен со Началникот на одделението за внатрешни работи во Дебар, го подготвија и го предадоа предметот до Основното јавно обвинителство во Дебар.
Јавното обвинителство итно ќе издаде налог за анализа на земените мостри од страна на акредитирана лабораторија, што ќе овозможи откривање на сторителот, односно изворот на загадувањето.
За делото опишано во Кривичниот законик во член 218 – “Загадување на животната средина и природата“ предвидена е казна затвор во траење од четири до десет години, или парична казна.“, се наведува во соопштението од Државниот инспектор за животна средина.
