Во Бугарија денеска ќе се одржат парламентарни избори, а во трката за 240-члениот бугарски парламенти ќе се натпреваруваат 6.895 кандидати, предложени од 30 партии и коалиции. Изборите се први што се одржуваат во услови на епидемијата од Ковид-19, јави дописникот на МИА од Софија.
Вкупниот број на гласачи во Бугарија е 6.732.316 лица. Граѓаните својот глас ќе го дадат на 11.983 гласачки места , а во 9.398 од нив ќе може да се гласа машински. Ова е втор изборен циклус во Бугарија на кој може да се гласа машински. Постојат 409 подвижни оддели за лица со попреченост, а, исто така, ќе има и оддели во одделенијата на болници во Ковид.
Денот на изборите во Бугарија почна во 7 часот утринава и ќе заврши во 20 часот по локално време.
Први што гласаа на парламентарните избори беа бугарски државјани кои живеат во Нов Зеланд, а последни ќе бидат Бугарите на Западниот брег на САД.
Во Република Северна Македонија ќе може да се гласа во Бугарската амбасада во Скопје, Генералниот конзулат во Битола, ќе има делови во Струмица, Штип и Охрид.
Според последните анкети на јавното мислење во Бугарија, владејачката партија на премиерот Бојко Борисов – ГЕРБ има убедливо водство од 8,5 отсто пред најголемата опозициска партија БСП, односно за ГЕРБ се изјансуле 28 отсто од избирачите, а за БСП 20 отсто.
Аналитичарите сметаат дека резултатот од парламентарните избори во Бугарија ќе го одреди излезноста и дали десницата или левицата ќе имаат повеќе пратеници во следниот бугарски парламент. Можно е партијата на ТВ-презентерот и шоуменот Слави Трифонов „Има таков народ“ и Движењето за права и слободи до крај да се борат за третото место, со што ќе се утврди дали левицата или десницата ќе имаат шанса да ја формираат новата бугарска Влада.
Според аналитичарите, доколку само 45 отсто од гласачите излезат на гласање, тоа ќе им помогне на ГЕРБ и нејзините потенцијални партнери да останат на власт, но доколку надмине 51 отсто можно е опозицијата да има шанса да ја формира новата влада.
Меѓу шест и осум партии ќе влезат во новото Национално собрание, со што формирањето на идното владеачко мнозинство ќе се направи понестабилно.
Стравот од Ковид-19 може да им забрани на постарите гласачи и на гласачите во карантин да одат и да гласаат на изборите во Бугарија.
Евелина Славкова од агенцијата „Тренд“ е убедена дека најголемите изненадувања се очекуваат по парламентарните избори во Бугарија, кога ќе стане јасен бројот на пратеници. Сепак, според Тихомир Безлов, виш аналитичар во невладината организација „Центар за проучување на демократијата“, новата бугарска Влада, каква и да биде, нема да има друг приоритет освен да се справи со пандемијата и какви мерки и стимулации да определи за да им помогне на бизнисите.
/МИА/
