Мониторингот на состојбите, инсталирање на најдобрите достапни техники во индустријата согласно Директивата за индустриски емисии и спроведување на Стратегии за подобрување на квалитетот на воздухот се најдобрите механизми за намалување на загадувањето на воздухот.
Ова беше посочено на денешната дискусија од претставници на повеќе граѓански организации, на тема „Одредување приоритети за спроведување на зелената агенда за секторите биодиверзитет и намалување на загадувањето на воздух, вода и почви“, во рамките на Националната конференија за клима.
На дискусијата исто така беше посочено дека плански документи за директна акција во однос на загадувањето на воздухот имаат само три општини – Скопје, Битола и Тетово. Тие се веќе дури и застарени, а од нив е имплементирано едвај 10 проценти. Како директна последица, немаме сеопфатна стратегија на локално ниво.
Во однос на водите, главни приоритети се инвестирање во пречистителни станици и за земјоделството и за урбаните отпадни води, но и мониторингот на водите кој пак бара соодветна инфраструктура.
Петра Поп Ристова од „Милиеуконтакт Македонија“ на дискусијата посочи дека земјоделството е еден од најголемите загадувачи на водата. Според Поп Ристова, ние си правиме самите на себе штета, преку понирање на водата во подолните слоеви на почвата, тоа повторно ни се враќа преку храната.
Во однос на почвите, еден од првите приоритети е Закон за почви, кој би ја уредил реставрацијата на почвите. Исто така, еден од приоритетите е и одржливото производство на храна.
Ана Чоловиќ-Лешоска од „Еко-свест“ се осврна на конфликтите меѓу заштитата на биодиверзиетот и постигнувањето повисоко учество на обновливите извори во производството на енергија.
-Треба да се прави длабок скрининг и енергетско просторно планирање, посочи таа.
Според независниот експерт Сашо Петровски – претставник од РЕФОРД, потребен е редовен мониторинг на состојбата на шумските екосистеми, зајакнување на соработката на истражувачките институции, зајакнување на мерките за заштита на шумите од абиотски и биотски фактори и постојана работа на зајакнувањето на свеста кај луѓето за одговорност кон шумските екосистеми, пред се, во заштитата од пожари.
Националната конференција за клима ја организираат „Еко-свест“, CNVP и Движењето на еколозите на Македонија.
извор: МИА
