„Во инфраструктурните проекти на североисточниот регион, се вбројуваат проекти во вредност од околу 700 милиони евра, кои ги опфаќаат изградбата на експресниот пат Ранковце – Крива Паланка, проширување на патот од Крива Паланка – Деве Баир, рехабилитацијата на патот од Куманово – Страцин, изградба на пругата од Куманово до границата со Бугарија.“, информираат од Владата на Северна Македонија.
„Во тек е изградба на автопатската делница Кичево – Охрид, во вредност од речиси 600 милиони евра.
Во план е изградба на целосно автопатско решение Ќафасан – Струга и Кичево – Гостивар – Тетово.
Железничкиот Коридор 8 во западниот дел од земјата со нова делница од Кичево до Лин, со проекција од околу 500 милиони евра.“, се наведува во објавата од Владата.
Од Владата истакнуваат дека сите овие проекти на Коридорот 8, кои се во вредност од околу 2,5 милијарди евра, се јасен сигнал и кон нашите граѓани, соседите во регионот, но и кон Европа, дека инвестираме во иднината.
Заменик-претседателот на Владата, задолжен за економски прашања, координација на економските ресори и инвестиции, Фатмир Битиќи, заменик-претседателот на Владата задолжен за борба против корупцијата и криминалот, одржлив развој и човечки ресурси, Љупчо Николовски и министерот за транспорт и врски, Благој Бочварски, денеска извршија увид во градежните активности кои се одвиваат на експресниот пат Ранковце-Крива Паланка, кој се гради во две фази, со вкупна вредност од 58,5 милиони евра.
„Денеска вршиме увид на изградбата на експресната делница Ранковце-Крива Паланка, еден од повеќето проекти со кои сакаме значително да ги подобриме транспортните услови на Коридорот 8. Само во северно-источниот дел на нашата земја во инфраструктурни проекти, ако се земат предвид патната и железничката инфраструктура, имаме проекти кои се во вредност од околу 700 милиони евра, а кои ги опфаќаат изградбата на овој експресен пат, проширувањето на патот од Крива Паланка до Деве Баир, потоа рехабилитацијата на патот од Куманово до Страцин, но и изградбата на пругата од Куманово до границата со Бугарија. Би сакал да потенцирам дека активно работиме и на западниот дел од Коридорот 8, каде веќе е во изградба автопатската делница Кичево-Охрид, во вредност од речиси 600 милиони евра, а во план е изградба и на целосно автопатско решение Ќафасан-Струга и Кичево-Гостивар-Тетово. И железничкиот Коридор 8 во западниот дел од земјата е во план да се гради, со нова делница од Кичево до Лин, за кој имаме готов проект, со проекција од околу 500 милиони евра и за кои веќе започнавме да комуницираме со меѓународните финансиски институции за обезбедување на средства. Сите овие проекти, на Коридорот 8, кои се во вредност од околу 2,5 милијарди евра, се јасен сигнал и кон нашите сограѓани, соседите во регионот но и Европа, дека инвестираме во иднината“, нагласи вицепремиерот Битиќи.