Основниот суд Скопје, во денешното рочиште на обвинетите во случајот „Трезор“, им изрече затворски казни.
Поранешниот директор на УБК Сашо Мијалков, како првообвинет во случајот „Трезор“, доби казна затвор од 8 години. Основниот Суд Скопје, на поранешниот шеф на неговиот кабинет Тони Јакимовски му одреди казна затвор од 5 години. Поранешниот помошник-министер во МВР Небојша Стајковиќ е осуден на казна затвор од 5 години. На поранешениот началник на Петтата управа во МВР Горан Грујевски, кој е во бегство, судот му одреди казна затвор од 15 години.
Од фирмата „Финзи“ се конфискува имотната корист остварена од кривичното дело во висина од 838 106 денари и 145 619 евра од девизна сметка плус возила
Предметот „Трезор“, се однесува на злоупотреба на средства од Буџетот на државата за набавка на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.
Во завршниот збор, Обвинителството истакна дека наместо МВР да направи директна набавка на електронско-комуникациска опрема за потребите на Петтата управа при УБК од фирмата ГАМА од Велика Британија, како најекономичен начин, тие договориле набавката да се изврши преку друга фирма – посредник Финзи ДООЕЛ Скопје, со што успеале да злоупотребат средства од буџетот на државата.
Според обвинението, во овој случај се злоупотребени над 860 илјади евра.
Одбраната, пак, во завршниот збор наведе дека обвинението за случајот е засновано врз претпоставки, дека постапката ја води неовластен тужител и на судот му предложи да донесе ослободителна пресуда, со оглед дека јавните обвинители не го докажале обвинението.
Случајот „Трезор“ го води судијката Џенета Бегтовиќ, а застапник на обвинението е ОЈО за организиран криминал, кое го презема предметот од поранешното СЈО.
J. Ѓ.
