Министерот за здравство Венко Филипче верува дека ќе има консензус од сите политички партии во Собрание во однос на измените Законот за здравствена заштита, со кој ќе се регулираат цените во приватните болници за хостпитализација на болните од Ковид-19.
Измените помина на владина седница завчера, а со нив се дава законско овластување на Владата да определува највисоки цени во приватните болници во висина на референтните цени утврдени од страна на Фондот за здравствено осигурување, со цел услугите на приватните клиники да бидат економски подостапни за граѓаните.
-Искрено верувам дека ќе има консензус за ваков закон во Собранието и дека сите пратеници од сите пратенички групи ќе покажат конструктивност затоа што станува збор за закон во интерес на граѓаните во услови на пандемија, изјави денеска Филипче одговараќи на новинарско прашање.
Во врска со барањата на опозицијата да се рефундираат парите на оние кои се лекувале од Ковид-19 во приватните болници, Филипче напомена дека тоа нема да се случи и додаде дека сите кои се одлучиле на такво лекување го правеле по своја волја, а не затоа што немало место во државните клиники.
-Мора јасно да се знаат неколку работи. Сите пациенти кои досега се лекувале во приватните болници, тоа го правеле по своја волја. Нема ниту пациент на кој му било потребно болничко лекување, а бил пратен во приватна болница затоа што немало место во државните. Места има и сега, имаше и во целокупниот изминат период на менаџирање на кризата. Имаше сосема доволен број слободни болнички кревети, согласно планот за реорганизација и системот на секојдневно менаџирање, истакна министерот за здравство.
Измените на Законот за здравствена заштита, предвидуваат и користење на ресурсите на приватните болници доколку условите го наложуваат тоа согласно состојбата предизвикана од пандемијата и се забранува преземање на здравствените работници од јавното здравство од страна на приватните здравствени компании. Предвидени се и измени во делот на глобите за прекршоци доколку приватните здравствени установи не постапуваат согласно законските одредби.
извор: МИА
