Петтиот сет државни мерки кој треба да им помогне на економски оператори во поглед на ублажување на негативните ефекти од корона-кризата и денес останува заглавен низ лавиринтите на Собранието. Финансиската инјекција, наменета и за помош на работодавачите во насока на исплаќање на плати кон вработените доцни, со што дел од вработените се уште ги немаат добиено ниту февруарските плати.
Продолжуваат игрите на релација позиција – опозиција и борбата за ситни политички поени врз грбот на оние најпогодените. Предлозите на законите за финансиска поддршка на физичките лица кои вршат самостојна дејност и на работодавачите кои се погодени од здравствено-економската криза остануваат блокирани на агендата на седницата бр. 36 на Собранието. Иако продолжението на седницата беше најавено за вчера, до изгласување на сетот економски мерки не дојде поради отсуството на кворум во салата за пленарни седници. Тројца пратеници од парламентарното мнозинство се наоѓаат во изолација поради позитивен резултат на ковид-19, додека пак, опозиционите пратеници не собраа храброст да се одважат и издигнат над партиските калкулации и решија дека за нив е поисплатливо собраниските случувања да ги проследат на телевизискиот екран непосредно пред салата.
Неодлучноста дали да се продолжи со седницата бр. 32 или прво продолжение да биде она на седницата бр. 36 е следното нешто за кое сведочиме. Многубројните загубени и загрозени работни места, но и огромниот стрес и неизвесност кои постојат кај оние чии претставници треба да бидат пратениците, не беа доволна причина овие мерки да се изгласаат вчера, дури ни по речиси нивно двомесечно задоцнување.
Дури ниту собранискиот спикер, Талат Џафери, на својот препознатлив начин не успеа да воспостави каков-таков ред кај пленумот и неговиот обид да ги собере пратениците во пленарната сала заврши неуспешно.
Дел од опозицијата, обидувајќи се да дефокусира околу наводна слаба кондиција на државниот буџет и немање доволно средства за овие мерки, беше експресно демантирана од страна на премиерот Заев. Тој наведе дека, буџетската каса е доволно исполнета и дека споредбено, мартовските приходи кои доаѓаат преку Управата за јавни приходи и Царинската управа, се дури и повисоки од оние во месец март 2020 година.
Под радарот на вниманието на целокупната јавност продолжува да биде партиското надмудрување помеѓу власта и опозицијата во Парламентот и отсуството на сенс за особено тешката состојба во која се наоѓа стопанството. Дел од граѓаните, очигледно, ќе останат уште некој период без сопствените заработени примања. Додека, пратениците продолжуваат да не потсетуваат како избирачи за пратеничкиот живот „во меур“ и немањето допир со реалноста и ургентноста која постои во моментов за надпартиски и синхронизиран настап околу анти-ковид мерките.
Иван Дургутов