Министерот за локална самоуправа Горан Милевски денеска ги посети Струмица и Радовиш. Во „Академијата за реинтеграција на маргинализираните лица во општина Струмица“ тој беше запознат со успешниот проект за унапредување на постоечките услуги во Југоисточниот регион за подобро вклучување на маргинализираните лица на пазарот на труд.
Инвестицијата од над шест милиони денари во Струмица е од Министерството за локална самопуправа и Швајцарската агенција за развој и соработка, а во неа десетина лица преку производство на различни видови овошје и зеленчук го поминуваат процесот на работна рехабилитација и се оспособуваат за пазарот на труд. Проектот го реализира невладината организација „Избор“ од Струмица.
-Тука се ангажираат луѓето за да го поминат процесот на работни вежби и рехабилитација, а лицата со попреченост работат тука и на тој начин обезбедуваат приходи. Ова е уникатен пример којшто го правиме и се надевам дека резулатите оттука ќе можеме да ги имплементираме и во другите плански региони, рече министерот Милевски.
Додаде дека на на тој начин се стимулира развојот на малото стопанство, а порача дека примерот на Југоисточниот плански регион треба да го следат и другите региони.
-Ние како министерството сакаме да доаѓаат проекти кои ќе значат зголемување на бруто домашниот производ, зголемување на конкуренцијата, но за жал добиваме проекти за канализација, водовод. Тоа е важно, но треба да финансираме и такви проекти, кои се специфични, каков што е овој во Струмица. Се надевам дека ќе биде пример за другите плански региони, но и општините треба да помагаат за проектот да има самоодржливост и не само да донираме пари, односно кога ќе заврши проектот да завршат и средствата, туку да биде долгорочно и да трае со самоодржливост, потенцираше министерот Милевски.
Според Сократ Манчев, претседател на „Избор“, Академијата за реинтеграција на маргинализираните лица во општина Струмица“ има една цел-да ги врати маргинализираните лица во општеството како нормални и прифатливи.
-Овој проект овозможува и успешна соработка со бизнис секторот, што е и една дополнителна компонента на тој проект, бидејќи во соработка со бизнис секторот креираме работни места, посебно за лицата со попреченост за да може и тие да имаат работен однос и да бидат самоодржливи во својот живот. Ваква друга можност не постои во нашата држава и засега работиме со одличен успех, бидејќи имаме добар тим кој го води целиот стручен процес, рече Манчев.
Секојдневно во работниот процес се ангажираат 8 до 10 лица, а од нив четворица се во работен однос, а другите волонтираат во зависност од потребите на одреден производствен процес.
Данче Поп-Иванова Илиева од Центарот за развој на Југоисточниот плански регион истакна дека како имплементатори на овој проект им овозможуваат на маргинализираните лица и лицата со попреченост да се осомостојат и да бидат корисни за општеството.
Министерот Милевски, заедно со градоначалникот на Радовиш, Герасим Конзулов, денеска го промовираа и успешниот проект за “Создавање на услови за поголема социјална инклузија на лицата со посебни потреби во Југоисточниот плански регион” во Центарот за дневна нега во Радовиш.
