Се помалку заразени, починати и хоспитализирани лица од КОВИД 19 во тетовско, регион кој беше еден од најпогодените од пандемијата. Сега на дневна основа има до петнаесетина пациенти суспектни на вирусот, по неколку позитивни случаи, а за изминативе десет дена има еден починат пациент од корона вирус.
„Добра е сликата и со хоспитализираните пациенти. Моментално во Ковид центарот имаме 6 лица кои се лекуваат од корона вирус, 5 од нив се на кислородна поддршка и сите имаат коморбидитети. Се надевам дека и овие пациенти ќе завршат добро, односно ќе се излекуваат и ќе бидат пуштени на домашно лекување. Ова е убава вест за сите, ако знаеме дека имавме повеќе Ковид одделенија каде се лекуваа позитивни на вирусот и до четириесетина лица и голем дел од нив завршуваа фатално. Сега е добро, се затворија Ковид одделенијата само остана едно, кое е сместено на едниот кат од интерното одделение“, рече д-р Гзим Нуредини координатор на Ковид центарот при Клиничката болница Тетово
За разлика од ноември, вирулентноста на вирусот изминативе неколку месеци беше застрашувачка“, додава д-р Нуредини.
„Ние во ноември имавме ситуација кога едно позитивно лице на вирусот ќе добиеше тешки симптоми, но можеби за десетина дена до две недели, тие симптоми ги добиваа претежно болни лица кои имаа други коморбидитети.Но, изминатиов период имавме случаи кога едно лице добива тешка клиничка слика за само неколку дена откако ќе му се дијагностицира вирусот, дали имавме некои нови соеви, дали се работеше за нешто сосема друго, тоа други експерти треба да утврдуваат и проучуваат, наше е да ги лечиме пациентите и да апелираме да се внимава, затоа што вирусот е се уште тука, тој не си заминал“, рече д-р Нуредини.
„Која беше причината за силината на вирусот, неговата вирулентност кој одзеде многу човечки животи можеби образложението треба да се бара во студијата од техничкиот факултет во Минхен еден од најпрестижните во светот“, вели специјалистот по хигиена и здравствена екологија д-р Ратко Давидовски од Центарот за јавно здравје Тетово.
Се работи за истражување и анализа која покажала дека вирусот Ковид-19 во комбинација со поленот кој го има во пролетниот период кога силината на вирусот беше алармантна, резултира со тешка клиничка слика кај пациентите.
„И тоа не се работи за пациенти со коморбидитети, туку за здрави пациенти каде поленот во комбинација со Ковид-19 дава бурна реакција кај пациентите. Ова истражување може да го земеме како веродостојно, затоа што се работи за еден од трите најпрестижни универзитети во светот за вакви истражувања. Испитувањето се вршело во 31 земја на 131 мерно место на илјадници испитаници, и заклучокот е тој. Затоа носењето на маски е многу добра препорака и старите епидемиолози секогаш велеа носете маски кога има вируси и тие го практикуваа носењето маски за заштита од разни вируси“, истакна д-р Давидовски.
Нуредини и Давидовски се надеваат дека овој позитивен тренд на сè помал број заразени, хоспитализирани и починати лица од Ковид-19 ќе продолжи и понатаму , но сепак се зависи од процесот на имунизација и се разбира од совеста, односно дисциплината на граѓаните.
Зоран Димовски
