Подготвени сме од први септември целосно да ги отвориме училиштата за настава со физичко присуство, изјави министерката за образование и наука Мила Царовска.
Министерството за образование и наука подготви три сценарија за старт на учебната година од први септември кои заедно со протоколите денеска беа презентирани на Главниот координативен кризен штаб.
„Министерството за образование и наука е подготвено за спроведување на сите три сценарија, но очекуваме да почнеме со првото сценарио. Сите во Владата сме согласни дека најдобро е сите ученици од први септември да се вратат во училишните клупи под протоколите за заштита од Ковид-19. Ова е првото и најпосакуваното сценарио, но сепак неговата примена ќе зависи од епидемиолошката состојба за што одлука ќе донесе Комисијата за заразни болести”, рече министерката за образование и наука Мила Царовска.
Второто сценарио, рече министерката е да се оди со хибридниот модел со којшто имавме успешна реализација на наставата во учебната 2020/21 година, и подразбира настава со физичко присуство да следат учениците од 1-4 одделение, додека останатите ученици наставата да ја следат на далечина.
Третото сценарио, пак, предвидува враќање на сите ученици во училиштата под здравствени протоколи со ротација на присуството на учениците на една недела.
Министерката Царовска потсети дека минатата учебна година која се одвиваше со онлајн настава, настава со физичко присуство од 1-3 одделение и следење часови на националната телевизија заврши успешно според распоредот, а тоа го потврди и најновата анализа на УНИЦЕФ.
