Договор меѓу владите на Северна Македонија и Грција за изградба на интерконекторот за природен гас беше потпишан од страна на министерот за економија на земјава Крешник Бектеши и грчкиот министер за животна средина и енергија, Костас Скрекас денеска во Атина. Станува збор за проект вреден околу 100 милиони евра, од кои 54 милиони евра се во Северна Македонија. Бектеши истакна дека интерконекторот ќе придонесе за диверзификација во снабдувањето, а ќе ѝ даде можност на Северна Македонија да ги снабди и со природен гас и северните соседи.
Клучен приоритет за полицијата е да се вратат активно финансиските истраги, потврди во гостувањето на „Утрински брифинг“, министерот за внатрешни работи, Оливер Спасовски. Тој откри дека поради неводењето на финансиски истраги, од 1991 година па се до 2017 година се реализирано единствено три конфискации на имот. Веќе се направени тимови кои паралелно работат на финансиска истрага и покрај кривичната истрага. Ако се нудат милионски суми за кауции, тоа е доволен мотив за финансика истрага. Не само што ќе се истражат тие понудени пари, туку уверен сум дека луѓето што ги нудат тие пари имаат многу повеќе средства стекнати на нелегален начин, освен овие што ги имаат понудено за кауција, вели Спасовски.
Собраниската Комисија за европски прашања денеска ја прекина седницата на која требаше да бидат разгледани во второ читање пакетот закони од областа на управување со отпад. ВМРО-ДПМНЕ повторно блокира закони… Како што појаснуваат од ВМРО-ДПМНЕ, тоа е направерно согласно барањата на здруженијата на граѓани и Иницијативата О2, со образложение дека прво е потребна широка јавна дискусија на овие теми, а потоа изјаснување во Собранието.
Министерството за правда ги демантира информациите дека набавило кафемат во вредност од над еден милион евра. Станува збор за грешка на веб-страницата на Бирото за јавни набавки, кое по реакција на Министерството е коригирана, велат од Министерството.
М. Миткоска
