Најмалку четири лица, меѓу кои и двајца пожарникари, загинаа во Германија, а околу 50 лица се водат како исчезнати откако шест куќи во регионот Ајфел се урнаа поради поројните дождови и поплавите.
Портпарол на полицијата во Кобленц потврди дека четири лица го загубиле животот. Нивните тела биле пронајдени на разни места. Други 25 куќи се изложени на ризик од уривање во областа Шулд во близина на Аденау, јави телевизијата СВР повикувајќи се на локалната полиција, пренесува Билд.
Некои места се отсечени од светот поради надојдените води. Многу граѓани се качија на покривите на своите куќи чекајќи спасувачките екипи да стигнат до нив со чамци.
Армијата е распоредена да им помага на загрозените жители, јави ДПА.
Железничкиот, речниот и друмскиот сообраќај е во прекин, а пловидбата по Рајна е прекината.
Се очекуваат денеска обилни врнежи од дожд во југозападна Германија, а дождот ќе врне до петок навечер, предупреди германската метеоролошка служба.
извор: МИА
