После протестот на антиваксерите, каде толпата против докторите погрдно извикуваше „Убијци, убијци…“, Асоцијата на специјализанти и млади лекари го повикуваат Министерството за здравство и лекарската комора да ги заштитат здравствените работници од антиваксерите.
„Најостро го осудуваме говорот на омраза кон докторите и сите здравствени работници кои и со живот го платија лекувањето на пациентите болни од Ковид“, пиушуваат на официјалната страна од Асоцијата на специјализанти и млади лекари.
Тие во реакцијата ја повикуваат Лекарската Комора да си ја врши својата работа и да ги заштити сите медицински лица, а Министерство за здравство да ги заштити сите вработени.
„Доколку било кој наш колега биде нападнат или вознемирен од толпата која протестира ќе прекинеме да лекуваме и ние ќе излеземе на улица.“, реагираат од Асоцијацијата.
Бројни се реакциите и осудите на медицинските лица после денешните протести
„Речиси никогаш, како тим, немаме реагирано на коментари и пишувања. Но, ова ги преминува сите граници. Ова не нѐ засега само нас, туку и сите наши колеги. Сите оние кои со изминативе две години спасуваат животи на тешко заболени од коронавирусот. Сите кои секојдневно ги жртвуваат своите животи, ги загрозуваат своите семејства и работат со пациенти заразени од коронавирус. Десетици колеги и починаа како последица на коронавирусот.“, реагира на Фејсбук д-р Марија Михајлова од ПЗУ Семед.
Михајллова, прашува – Ова е „фала“? Извици со „убијци, убијци“?
„Ова е огромно разочарување, кое освен за медицинарите, е и за општеството. Секој има право на различно мислење, секој има право да си искаже како ги перципира состојбите, да се вакцинира или не.. Но не и на вакви карактеризирања. Никој не бил принуден на лекарски третман, туку секој сам се јавува на лекување. А за ние да лекуваме, сме го посветиле цел живот на образување кое трае и до денеска. Никој не бил натеран ниту на вакцинација, бидејќи секој сам си се изразува според негова воља.
Туку каде се лекуваат овие лица за кои докторите се „убијци“? Ги повикуваме сите здруженија и институции на осуда на ваквото омаловажување на професијата и медицинарите.“, наведува во реакцијата д-р Михајлова.
И доктор Сашко Николов, градоначалникот на Штип, во објава на Фејсбук прашува дали има крај на ова лудило и непочитување на медицинскиот персонал кои секојдневно, без ден годишен одмор и запоставуваќи ги своите семејства се бори со коронавирусот.
„Да се критикуваат луѓето (целиот медицински персонал) кои 16 месеци без прекин 24/7, не користеле ниту ден годишен одмор, си ги запоставиле сопствените семејства, заборавиле како тоа изгледа да имаш слободен ден, ја ставиле на страна безбедноста на сопствениот живот, се со цел да го заштитат нашето здравје и нашите животи…
Па луѓе, има ли крај ова наше лудило и непочитување!!!
Згора на се, ниту маски, ниту дистанца, ниту почитување на било какви мерки, на некакви протести…
Страшно, но во исто време и жалостно…“, реагира доктор Николов.
На протестите против кризните мерки, како што можеше да се забележи најголем дел од толпата не се придржуваа кон мерките за претпазливост од Ковид-19. Беа палени маски, се повикуваше на кинење на флаери што предупредуваат на опасноста од коронавирусот и извикувани беа бројни погрдни пароли “Доктори, убијци…“, а беше вулгарно навредуван и министерот Филиче.
Ј. Ѓ.
