Министерката Мила Царовска очекува дека Владата на седница денеска ќе донесе одлука за почеток на учебната 2021/2022 година со физичко присуство на наставата, по препорака од Главниот кризен штаб кој вчера на состанок оцени дека се создадени услови за отворање на училиштата.Тоа ќе значи дека од 1 септември сите ученици (од прво до деветто во основно и учениците во средните училишта) ќе се вратат во училишните клупи, за разлика од минатата учебна година кога на настава физички присуствуваа само учениците до трето одделение и повозрасни ученици во мали училишта односно подрачни и во рурални средини, а другите следеа онлајн-настава. Исклучок од одлуката за настава во училиште може бидат учениците со хронични болести или кои имаат член во семејството со хронична болест.
Онлајн-настава ќе следат и оние ученици кои ќе бидат во изолација.
– Минатата година покажавме дека може да има е успешна онлајн учебна година, но нема подобро образование од она со физичко присуство. Затоа што искуствата и во светот, и кај нас, покажуваат дека менталното здравје и социјализацијата се дел од учењето. Училиштата се веќе обучени, има протоколи, лани беа отворени за помалите ученици и немавме инциденти на интерно ширење на вирусот. Затоа, за оваа година, во интерес на учениците, Кризниот штаб препорача и денеска имаме владина седница на која очекувам дека ќе биде потврдена одлуката, рече Царовска, одговорајќи на новинарски прашања при посета на ОУ со ресурсен центар „Иднина“.
Очекува наставата во училиштата да се одвива без проблеми зашто и искуството лани покажало дека во училиштата немало трансмисија на вирусот. За спречување на ширење на вирусот ќе придонесе почитувањето на здравствените протоколи, како и имунизирањето на вработените во училишатата. Досега над 62 отсто се вакцинирани што, рече Царовска, е двојно повисок од националниот просек на вакцинација.
– Презадоволна ќе бидам ако постигнеме 80 проценти. Наставниците се враќаат од одмор и сигурна сум дека ќе има уште една поголема акција на вакцинирање до 1 септември и уште побезбедно ќе се чувствуваме во училиштата, истакна Царовска.
Министерката посочи и дека постојано ќе се следат препораките од Комисијата за заштита од заразни болести, а доколку дојде до влошување на состојбата и се зголеми ризикот, потсети дека МОН е подготвено и за две други сценација кои ги претстави минатиот месец – онлајн-настава и комбинирано следење на наставата односно неделно ротирање на групи ученици за настава во училиште и онлајн. Епидемилошките служби во училиштата, рече таа, ќе проценуваат и ќе утврдуваат дали некој ученик/ци или цело одделение ќе треба да бидат изолирани.
-Минатата година покажавме дека тоа одлично функционира, со брзата интевренција на здравствените служби, и немаше интерна трансмисија во ниту едно училиште. Затоа очекувам на истиот начин да функционира и од оваа учебна година, додаде Царовска, порачувајќи дека успехот ќе зависи и од совесноста за помасовно вакцинирање и почитување на протоколите. Не очекува да биде проблем тоа што учениците ќе треба часовите да ги следат со заштитна маска, бидејќи, рече, малите ученици лани ги носеле во училница и бргу се навикнале на обврската.
-Додека се во училница, носат маска, но, секако, имаат по пет минути излегување според распоредите и тогаш ќе може да се ослободат од маската и повторно ќе ја носат при влегување внатре. Минатата година покажа дека тоа е возможно и дека тие се навикнуваат на протоколите многу побрзо од возрасните, додаде министерката Царовска./МИА/.
