-Почитувани Македонци, Албанци, Турци, Срби, Бошњаци, Роми, Власи и сите други граѓани, Нека ни е честита 30-годишнината од независноста на нашата заедничка држава! На денешен ден, пред 30 години, се оствари сонот на сите генерации кои се бореа и гинеа за нашата слобода. Македонската државност е беа сомнение нашето најголемо заедничко историско постигнување. Денес, имаме привилегија да имаме своја, независна држава. Во исто време, имаме и голема одговорност – да вложуваме во неа за да биде достоен дом за секој од нас. Каква држава ќе изградиме, таква држава ќе имаме, вели претседателот во видео честитка.
Драги сограѓани, Да се почитуваме и разбираме меѓу себе. Да сфатиме дека различниот од нас не е наш непријател. Да ја разбереме политиката како борба за идеи и концепти за подобро денес и утре, а не како борба на живот и смрт. Ние немаме резервна држава. Северна Македонија е нашиот единствен, заеднички дом и ќе биде пристојно место за живеење само ако секој од нас го вложи во него својот труд, својата одговорност и својата совест.
Почитувани сограѓани, Нека ни е честита 30-годишнината од независноста! Да ни е вечна и вековита државата!, стои во видео честитката на Пендаровски.
