Еврокомесарот за проширување Оливер Вархеји оцени дека граѓаните на Западен Балкан може да ја предизвикаат следната мигрантска криза доколку Европа дозволи да пропаднат ветувањата за проширување и ја повика ЕУ да ја засили соработката со земјите од Западен Балкан за миграција.
Во интервју за Маѓар Немзет, Вархеји рече дека авганистанската криза покажала „колку се сериозни последиците ако нема цврстина и конзистентност во геополитичките одлуки“, пренесува ЕУОбсервер.
– Мора да ги исполниме ветувањата за Западен Балкан. За мене, тоа е една од најважните лекции за ситуацијата во Авганистан, рече Вархеји.
– Ајде да замислиме што ќе се случи ако процесот на пристапување на нашите партнери од Западен Балкан уште повеќе да се пролонгира и – од некоја геополитичка причина – она што го ветивме не се случи на крајот, рече Вархеји. Тој додаде дека „географски, Западен Балкан е многу поблиску до Европа отколку Авганистан“, што значи дека „интеграцијата на тој регион мора да биде европски приоритет“.
Говорејќи за самитот ЕУ-Западен Балкан закажан за октомври, комесарот рече дека со нетрпение очекува да види кои делови од европските економски развојни планови на регионот може да се спроведат.
– Целта е да се поддржи долгорочна стабилност и мир во регионот, додаде тој.
Во врска со пристапувањето на Албанија и Северна Македонија, Вархеји рече дека двете земји ги исполнуваат сите критериуми за почеток на пристапните преговори.
Во интервјуто Вархеји, исто така, повика на „нов вид на партнерство“ помеѓу ЕУ и Турција, како во економската соработка, така и во врска со заедничкото решавање на мигрантското прашање./МИА/.
